ने. सं. ११४४ कौलाथ्व एकादशी - चालं

खुया यंकूगु सम्पदा नेपाः लित हल

येँ(नेपालभाषा टाइम्स)- नेपाःया थीथी थासं थीथी इलय् खुयाः अमेरिका यंकूगु पुरातात्विक महत्वया स्वंगू दर्जनं मल्याक सम्पदा नेपाः लित हःगु दु । नेपाःया थीथी थासं खुया यंकाः मिउगु पुरातात्विक महत्वया ३९ गू सम्पदा नेपाः लित हःगु खः ।

१९ औं व २० औं शताब्दीया काष्ठकलाया चित्र, मूर्तित नेपाः लित हःगु खः । बहुमूल्य थुपिं दक्वं ज्वलं नेपालं खुया यंकाः अमेरिका यंकूगु खःसा हवाई राज्यया भंसार तथा सीमा सुरक्षा निकायं बरामद याःगु खः । सन् २०१० य् हवाई सीमा सुरक्षा निकायं बरामद याःगु सम्पदाया तौल १,६११ केजी दु ।

सन् २०११ य् नेपाल सरकारं बहुमूल्य थुपिं सम्पदा नेपाःयात हे लित बीत इनाप यासें अमेरिकी सरकारयात औपचारिक रुपं इनाप याःगु खः । नेपाल सरकारं अबलय् हे बहुमूल्य सम्पदाया ‘उत्पत्ति मुलुक’ नेपाःयात लित बीत औपचारिक रुपं इनाप याःगु खः । सीदुकथं काष्ठजन्य कला, चित्र व मूर्तित नेपाः तिब्बती सामानया कारोबार याइपिं थोक व्यापारीतपाखें अमेरिकाया हवाई राज्यय् थ्यंगु खः ।

नेपाल सरकारया इनापकथं हे सन् २०२३ मे ११ कुन्हु आवश्यक दक्वं प्रक्रिया पूवंकाः अमेरिकास्थित नेपाली राजदूतावासय् छगू ज्याझ्वः यासें दूतावास मार्फत अमेरिकी सरकारं नेपाल सरकारयात थुपिं सम्पदा लःल्हाःगु खः । तर उगु इलय् तौलया कारणं नेपाः छ्वया हयेत सहज मजुयाच्वंगु खः ।

लिपा सान डियागोया निंतिं नेपाःया अवैतनिक महावाणिज्य दूत ऋषि पुन्नाखर ढकालया सक्रियताय् कतार एअरवेजं निःशुल्क रुपं थुपिं सम्पदा ढुवानी यायेत सहमत जुइवं अमेरिकास्थित नेपाली दूतावासया समन्वयय् थुपिं सम्पदात नेपाः लित हःगु खः । थ्व स्वयां न्ह्यः नं ढकालया सक्रियता व पहलय् ८ औं शताब्दीया यलया बुंगय् च्वंम्ह बुद्धया ल्वहंया मूर्ति व १० औं शताब्दीया नृत्यदेवीया सिँया मूर्ति नेपाः लित हयेधुंकूगु दु ।