ने. सं. ११४४ कौलाथ्व पारू - नःलास्वनेगु

‘स्वेच्छिक अवकाशया निवेदन लित का’

येँ – शेरबहादुर देउवाया सरकारं घोषणा यानातःगु स्वेच्छिक अवकाशया कार्यक्रमयात वर्तमान सरकारं खारेज याना बीवं अवकाशया लागिं निवेदन बीधुंकूपिं कर्मचारीत जिल्ल जूगु दु । देउवा सरकारं याःगु उगु आह्वान कथं देय्न्यंकं ९,६०० म्ह निजामती कर्मचारीतय्सं स्वेच्छिक अवकाशया लागिं निवेदन बिउगु खः ।

तर देउवा वनेधुंकाः वःगु केपी ओलीया सरकारं देशयात कर्मचारी आवश्यक जुयाच्वंगु इलय् सरकारं थप सुविधा बियाः स्वेच्छिक अवकाश बी फइ मखु धासें उगु आह्वान हे खारेज याना बिल । स्वेच्छिक अवकाशया कार्यक्रम घोषणा जुइवं लछि निला जक कार्यकाल ल्यं दनिपिं कर्मचारीतय्सं तकं सुविधा काये खनी धकाः स्वेच्छिक अवकाशया लागिं निवेदन बिउगु खः ।

सरकारं उगु कार्यक्रम बारे आलटाल यानाच्वंगु थ्व अवधि दुने हे निवेदन बिउपिं मध्ये १३०० म्ह कर्मचारीत नियमित प्रक्रिया कथं हे अवकाशय् वनेधुंकूगु दु । आः सरकारं मेपिं ल्यं दनिपिं कर्मचारीतय्त नं अवकाशया निंतिं बिउगु निवेदन लित का धकाः निर्देशन जारी याःगु दु । सरकारं हे दयेकातःगु कर्मचारी समायोजन नियमावली कथं धाःसा अवकाशया लागिं बीधुंकूगु निवेदन हानं लित काये दइ मखु धकाः व्यवस्था यानातःगु दु ।

उकिं थःपिंसं बीधुनागु निवेदन छु यायेगु धकाः नं कर्मचारीत अन्यौलय् लानाच्वंगु दु । तर सामान्य प्रशासनमन्त्री लालबाबु पण्डितं बिउगु निवेदन सरकारं अस्वीकृत याःगुलिं व लित काःगु सरह हे जुइ धयादीगु दु । तर अवकाशया मानसिकता दयेकाः निवेदन हे बीधुंकूपिं कर्मचारीतय्सं हानं लिहां वयाः प्रभावकारी सेवा बी फइ ला धइगु न्ह्यसः नं प्रशासन ख्यलय् पिहां वयाच्वंगु दु ।