ओलीं वार्ताया नामय् झुले यानाच्वंगु शंका

येँ – नेकपा (एमाले)या वरिष्ठ नेता माधव नेपाल पुचलं पार्टीया अध्यक्ष लिसें प्रधानमन्त्री केपी शर्मा ओलीं वार्ताया नामय् थःपिंत झुले यायेत जक स्वःगु महसुस जुयाच्वंगु खँ धाःगु दु । माधव नेपाल–झलनाथ पुचःपाखें वार्ता समितिइ च्वनाच्वंपिं दुजःपिं सुरेन्द्र पाण्डे व घनश्याम भुसालं म्हिगः जूगु थःगु पक्षया केन्द्रीय दुजःतय् भच्र्युअल मुँज्याय् उगु आशंका प्वंकादीगु दु ।

मुँज्याय् भुसाल व पाण्डें ओली पक्ष लिसे सहलह जूगु खःसां नं ठोस प्रगति धाःसा मजूगु खँ धाःगु खः । बैठकय्वय्कःपिंसं धयादिल, ‘ओली पक्षं वार्ताय् च्वनेगु धइगु खँ वल, पार्टी मिले जुल धाःसा वार्ता यानाः छुं स्यनी मखु धकाः जिमिसं नं कुतः याना । तर व वार्ता यानाः जिमित छ्यलेत जक स्वःगु थें अनुभूति जुल ।’

उकथं हे म्हिगःया बैठकय् न्ववाःपिं आपालं नेतातय्सं ओलीया लिउलिउ वनेमजिउगु सुझाव बिउगु खः । उमिसं स्पष्ट कार्यदिशा सहित न्ह्याः मवनेगु खःसा कम्युनिष्ट आन्दोलनय् तःधंगु क्षति जुइ धासें आः प्रधानमन्त्री ओलीया लिउलिउ वनेगु औचित्य मदयेधुंकूगु खँ धाःगु दु ।

माधव–झलनाथ पुचलं पार्टीया केन्द्रीय बैठक धकाः उगु बैठक सःतूगु खः । उकी मुक्कं गोकर्ण बिष्ट, सुरेन्द्र पाण्डे, योगेश भट्टराईपिं लगायत ८६ म्ह केन्द्रीय दुजःतय्सं ब्वति काःगु खः ।
माधव नेपाल पुचलं सःतूगु उगु केन्द्रीय बैठकय ब्वति मकायेत एमालेपाखें अध्यक्ष केपी ओलीं सकलें दुजःतय्त निर्देशन जारी याःगु खः । ब्वति काःपिं दुजःतय्सं नेतातय्त याकनं निर्णय यायेत इनाप याःगु खः ।