ने. सं. ११४४ कौलाथ्व पारू - नःलास्वनेगु

मातृभाषा शिक्षाया दायित्व सरकारं क्वबीमाःगु विधेयक पारित

येँ – म्हीग च्वंगु प्रतिनिधिसभाया बैठकं मातृभाषां आखः ब्वंकीगु स्कूल चायेकेगु दायित्व राज्ययागु नं खः धइगु बुँदा समेत दुथ्याकाः शिक्षा विधेयक पारित याःगु दु ।संविधानय् मातृभाषां आखः ब्वने दइगु अधिकार सकसिकें दइ व थ्व राज्या दायित्व खः धकाः उल्लेख याना तःगु दःसां नं सरकारं हःगु शिक्षा विधेयकय् मातृभाषां आखः ब्वंकेगु ज्या सम्बन्धित समुदाय थःपिंसं हे यायेमाः धकाः च्वयातःगु कारणं संघीय समाजवादी फोरमया सांसद राजेन्द्र श्रेष्ठं उकिया विरोध संशोधन प्रस्ताव दर्ता यानादीगु खः । वय्कःया संशोधन प्रस्तावयात नं अंगीकार यासें आः विधेयकय् मातृभाषां निःशुल्क आखः ब्वंकेगु दायित्व राज्ययागु नं जुइ धइगु बुँदा दुथ्याकूगु खः ।

शिक्षा विधेयकयात कयाः संसदय् मेमेगु खँयात कयाः ३२ गू संशोधन प्रस्ताव दर्ता जूगु खःसां मातृभाषां आखः ब्वंकेगु दायित्व राज्ययागु जुइ धइगु खँय् धाःसा मेपिंसं छुं न्वमवाःगु खः । थःगु संशोधन प्रस्तावया पक्षय् न्ववासें वय्कलं सदनय् सरकारं मृत जुइधुंकूगु संस्कृत शिक्षाया लागिं व्यवस्था यायेगु तर जीवित दनिगु भाषाातय्गु लागिं धाःसा जिम्मेवारी मकायेगु पाय्छि मखु धइगु बिचाः तयादीगु खः ।

आः विधेयकय् माध्यमिक तह तकया शिक्षा बीगु दायित्व स्थानीय सरकारयागु जूगु कारणं स्थानीय सरकारं थःथाय् प्रचलित मातृभाषां प्राथमिक तह तकया शिक्षा बीगु व्यवस्था याये फइ धइगु बुँदा विधेयकय् दुथ्याकूगु खः ।
सांसद श्रेष्ठं दर्ता यानादीगु उगु संशोधन प्रस्तावया समर्थनय् पिने च्वनाः आपालं जनजाति व भाषा आन्दोलनया न्ह्यलुवातय्सं नं साथ बिउगु खः ।

वय्कःयात थ्व बुँदा दुथ्याकेगु जुल धकाः न्ह्यव हे जानकारी वःगु खःसां विधेयक पास जुइधुंकाः जक उकिया आधिकारिकता पुष्टि जुइगु खँ धयादीगु खः ।

‘संशोधन सकारात्मक’
मातृभाषां शिक्षा बीगु दायित्व राज्यं काये मालीगु कथं कानूनय् जूगु थ्व संशोधनयात सांसद श्रेष्ठं सकारात्मक रुपं कयादीगु दु । सदनय् नेवाः लगायत मेपिं नं आदिवासी जनजातिया सांसदत दुसां उमिसं थ्व विषयय् चिउताः मतःगु खँय् धाःसा वय्कलं दुःख प्वंकादीगु दु । थज्याःगु मामिलाय् सकलें आदिवासी जनजाति सांसदतय्गु छसः जुयाः न्ह्याः वनेमाःगु थासय् थः याकःचा जूगु खँय् वय्कलं दुःख प्वंकादीगु खः ।