ब्लोदानया २२ क्वःगु साधारणसभा

येँ – ब्लड डोनर्स एशोसियसन नेपाल (ब्लोदान)या २२ क्वःगु साधारणसभा संस्थाया केन्द्रीय अध्यक्ष ई. सानुबाबु प्रजापतिया सभापतित्वय् जुल । उगु ज्याझ्वःया मूपाहां येँ क्षेत्र नं ७या संघीय संसदया दुजः रामवीर मानन्धरं हिदानया महत्व बारे कुलादिसें ब्लोदानं याना वयाच्वंगु ज्यात अतिकं च्वछायेबहजू धयादिल ।

लिसें वय्कलं हिदान थेंज्याःगु मानवीय ज्याय् न्ह्यचिलाच्वंगुलिं ब्दोदानया कार्यसमितियात सुभाय् नं देछानादिल । ज्याझ्वलय् विशेष पाहां यल महानगरपालिकाया उपप्रमुख गीता सत्यालं प्रत्यक्षरुपं मानव जीवनलिसे सम्बन्ध दुगु हिदान थेंज्याःगु मानवीय ज्याय् न्ह्यचिलेगु धइगु धाथेंया पुण्यया ज्या जूगु धासें यल महानगरपालिकां नं हिदानया क्षेत्रय् उल्लेखनीय ज्या याना वयाच्वंगु दु धयादिल ।

ज्याझ्वःया सभापति ई. प्रजापतिं वंगु स्वंगू दशक न्ह्यवंनिसें स्वयंसेवी हिदानया क्षेत्रय् निरन्तर रुपं लगे जुयाच्वंगु संस्थां थीथी हाथ्याया बावजुद नं थनतक थ्यंकेत सफल जूगु धासें संस्थायात ग्वाहालि यानादीपिं, थीथी संघसंस्थाया प्रतिनिधि, शुभचिन्तकपिंत सुभाय् देछानादिल ।

अथे हे ज्याझ्वलय् पाहांकथं झायादीपिं येँ महानगरपालिका वडा नं. १७या वडाअध्यक्ष नवीन मानन्धर, कास्कुनया उपाध्यक्ष नवराज अर्याल, ब्लोदानया वरिष्ठ सल्लाहकार लोकनारायण सुवेदी, सल्लाहकार राजेश श्रेष्ठ, हास्य कलाकार सन्तोष पन्त लगायतं हिदान, हिया महत्व व ब्लोदानं म्हिता वयाच्वंगु भूमिकयात कयाः थःथःगु धारणा तयादीगु खः ।

ब्लोदानया उगु साधारणसभाय् महासचिव केशव महर्जनयात ‘ ब्लोदान अफ दि इयर’, सल्लाहकार राजेन्द्रकुमार श्रेष्ठ व केन्द्रीय रक्तसंचार सेवाया वरिष्ठ जनसम्पर्क अधिकृत लक्षिमा भट्टराईयात नं सम्मान याःगु खः ।

थुकथं हे ब्लोदानया ‘ब्लड फण्ड’या निंतिं ग्वाहालि यानादीपिं नारायणबहादुर बासुकला, कृष्णप्रसाद मानन्धर व पूर्णकाजी प्रजापति मतिनाया चिं नं लःल्हाःगु खः । साधारणसभाय् महासचिव केशव महर्जनं वार्षिक व कोषाध्यक्ष मचाकाजी महर्जनं आर्थिक प्रतिवेदन न्ह्यब्वयादीगु खः ।

सम्बन्धित बुखँ

LEAVE YOUR COMMENTS