‘चिनियाम्ह किसिचा’ अंग्रेजी अनुवाद सफू पिदन

येँ(नेपालभाषा टाइम्स)- जनकवि दुर्गालाल श्रेष्ठया मचा चिनाखँ मुना सफू ‘चिनियाम्ह किसिचा’या अंगे्रजी अनुवाद सफू पिदन । शनिवाः थनया जनबहाः पिनेसं च्वंगु नासः दबुलिइ जूगु छगू ज्याझ्वःया दथुइ उगु अंगे्रजी अनुवाद सफूया पितब्वज्या याःगु खः ।

जनकवि श्रेष्ठं थनिं खुगू दशक न्ह्यः उगु मचा चिनाखँ मुना सफू च्वयादीगु खः । उगु इलय् च्वयादीगु मचा चिनाखँ सफू नेपालभाषा साहित्यया ख्यलय्् हे दकलय् अप्वः प्रति छापे जूगु व दकलय् अप्वः प्रकाशन जूगु कृतिया रुपय् कायेगु यानातःगु दु ।

किहोटेज कोभ प्रा.लिं. पिथंगु उगु सफू डा. कृतिश राजभण्डारीं अंगे्रजी भासं अनुवाद यानादीगु खः । सफू पितब्वज्या ज्याझ्वलय् लोककवि राजभाई जकःमि, ‘नेपालभाषा टाइम्स’ न्हिपौया सम्पादक सुरेश मानधरं जनकवि श्रेष्ठ व वय्कःया कृतित्वया बारे नुगःखँ तयादीगु खः । ज्याझ्वलय् थीथी ब्वनेकुथिया विद्यार्थीपिंसं सफुतिइ दुथ्यानाच्वंगु मचा चिनाखँ वाचन यानाः न्यंकूगु खः ।

वंगु शनिवाः येँया अतिकं व्यस्तगु असं लागायु ‘इकोज इन दि भ्याली’ ज्याझ्वः जूगु खःसा उगु हे ज्याझ्वःया छगू अंशया रुपय् जनकवि श्रेष्ठया अंगे्रजी अनुवाद यानातःगु सफू नं पितब्वज्या याःगु खः ।