यँयाःया कोष अझं अलपत्र
येँ (नेपालभाषा टाइम्स)- येँ देय्या तःजिगु पर्व यँयाः न्यायेकेत समस्या मजुइमा धकाः येँ महानगरपालिकां थनिं प्यदँ न्ह्यः घोषणा याःगु यँयाःया अक्षय कोष आः तकं खडा जुइ मफुनि । घोषणा जुइधुंकूगु कोष सुचारु याना बी माल धकाः इन्द्रजात्रा व्यवस्थापन समितिया पदाधिकारीत आः तकं थीथी सरकारी ज्याकुथिइ ब्वाँय् जुइ मालाच्वंगु दनि ।
म्हिगः तिनि समितिया नायः गौतम शाक्य, न्वकु दीपक श्रेष्ठ हेटौंडा वनाः बागमति प्रदेशया संस्कृति मन्त्री पुकार महर्जनयात नापलानाः कोषय् ध्यबा तयेत इनाप यानादीगु खः ।
न्हापा घोषणा जूकथं यँयाःया लागिं न्यागू करोड तकाया अक्षय कोष दयेकेगु खँ जूगु दु । थ्व न्यागू करोड मध्ये संघीय सरकारपाखें निगू करोड, येँ महानगरपालिकां छगूत्या करोड, बागमति प्रदेश सरकारं छगू करोड व गुथि संस्थानं न्यय्गू लाख तका दां तयेगु सहमति जूगु खः । तर सहमति जुयाः कोषया घोषणा समेत जुइधुंकाः ध्यबा तयेगु खँय् धाःसा सुं हे न्ह्यमचिउ । उकिं कोषय् ध्यबा तया बी माल धकाः व्यवस्थापन समितिया पदाधिकारीपिं थीथी थासय् वनाः इनाप यानाच्वंगु दु ।
म्हिगः हेटौंडा झाःम्ह व्यवस्थापन समितिया नायः गौतम शाक्यं ‘नेपालभाषा टाइम्स’ यात कनादीकथं प्रदेशया संस्कृति मन्त्री कोषय् ध्यबा तया बीत सकारात्मक जुयादीसां आः प्रदेशयाके बजेट धाःसा मदु, उकिं आकिवं बजेट दयेकेबलय् ध्यबा तया बीगु बचं बियादीगु दु ।
आः येँय् लिहां वयाखतं गुथि संस्थानय् नं थ्वहे पौ बीगु खँ वय्कलं कनादिल । गुथिपाखें नं फुसा थुुगुसी हे ध्यबा तया बीगु बचं वःगु खँ नं वय्कलं कनादिल ।
महानगरपालिकां थ्व कोषया घोषणा याःगु प्यदँमछि दयेधुंकल । तर इलय् हे सम्बन्धित सरकारतय्पाखें बजेट निकासा मजूगुलिं कोषया विषय हे अलपत्र जुयाच्वंगु खः । आः स्वंगुलिं तहया सरकार हिलेधुंकूगु व फुक्क हे थासय् न्हूपिं पदाधिकारीत वयेधुंकूगु जुयाः थ्व कोषया जानकारी तकं सुयाकें मदुगु व न्हापा बियातयागु पौ तकं गनं मदुगु खँ नं शाक्यं कनादिल ।
कोष दयेकेत छाय् लिबाःगु ?
यँयाः हनेगु लागिं सरकारयाके घरीघरी ध्यबा फ्वं वनाच्वनेगु पलेसा थुकिया थःगु हे छगू कोष दत धाःसा ज्या यायेत अःपुइ धकाः इन्द्रजात्रा व्यवस्थापन समितिइ भाजु मोहन डंगोल दुगु इलंनिसें हे माग जुयाच्वंगु खः । येँ मनपाय् विद्यासुन्दर शाक्य मेयर जुयाः वयेधुसेंलि वय्कःया हे पहलय् तत्कालीन सरकारं थ्व कोषया घोषणा याःगु खः ।
तत्कालीन संस्कृति तथा पर्यटन मन्त्री योगेश भट्टराईपाखें थुकिया घोषणा जूगु खः । तर गबलें कोषय् पदाधिकारी थपे याये मानिगु, गबलें कोषया कार्यविधि दयेके मानिगु आदि आदि खँ पिहां वयाः कोष निर्माणया ज्या लिज्यानाच्वंगु खः । आः धाःसा सकलें सकारात्मक जूगुलिं कोष दयेके फइगु आशा जूगु दु ।
LEAVE YOUR COMMENTS