विमानस्थलय् हे निम्ह पाइलटया मुड्कामुड्की
येँ (नेपालभाषा टाइम्स)- रामेछापया मन्थली विमानस्थलय् तारा एयरया निम्ह पाइलटतय् दथुइ ल्हाः तयाः ल्वापु जूगु दु । पाइलटतय् ल्वापुं यानाः विमानस्थलय् तनाव ब्वलंगु दुसा नेपाल नागरिक उड्डयन प्राधिकरणं ल्वापु याःपिं निम्हं पाइलटतय्त सजाय स्वरुप लाइसेन्स निलम्बन यानाः विमान ब्वयेके मबिसे ‘ग्राउण्डेड’ याना बिउगु दु ।
प्राधिकरणं धाःकथं मन्थली विमानस्थलय् तारा एअरया वरिष्ठ क्याप्टेन सन्तोष शाह व क्याप्टेन सञ्जीव श्रेष्ठया दथुइ ल्वापु जूगु खः । ल्वापुया कारण धाःसा सी मदुनि । निम्ह पाइलटया दथुइ ल्हाः तयाः ल्वापु जूगु कारणं प्राधिकरणं निम्हं पाइलटयात ग्राउण्डेड यायेगु लिसें मन्थली विमानस्थलया प्रमुख अशोक थापायात नं निलम्बन याना बिउगु दु ।
थ्वहे झ्वलय् झगडिया मध्ये छम्ह क्याप्टेन सन्तोष शाहं म्हिगः हे मन्थलीया प्रहरी कार्यालय वनाः क्याप्टेन सञ्जीव श्रेष्ठ विरुद्ध उजुरी दर्ता याःगु दु । क्याप्टेन शाहं दर्ता याःगु उजुरीइ धयातः कथं शाह लुक्लाया उडानपाखें मन्थली थ्यंगु व श्रेष्ठ मन्थलीं उडान यानाः लुक्ला वनेत्यंगु इलय् ल्वापु जूगु खः । निम्हं पाइलटत विमानस्थलय् नापलायेवं श्रेष्ठं ल्हाः मिले याये थें यानाः थःत न्यतालय् थप्पड नकूगु दावी शाहं याःगु दु । थःत न्यतालय् दायेधुंकाः अझ घ्वाना छ्वःगु द्वपं नं शाहं बिउगु दु ।
शाहया उजुरी वयेवं प्रहरी कार्यालयं श्रेष्ठयात स्वापू तयाः न्यनेकने याःबलय् श्रेष्ठं थ्व थःपिनि व्यक्तिगत ल्वापु खः, थुकिया बारे अन हे वयाः खँ ल्हाः वये धकाः लिसः बिउगु खँ धाःगु दु । तर मन्थली विमानस्थलं धाः कथं अन निम्ह पाइलटतय् दथुइ ल्हाः ल्हाः तयाः ल्वापु जूगु खः । विमानस्थलय् च्वनाः ल्वापु जूगु कारणं उमि छु खँय् ल्वापु जूगु खः सी मदु धाःगु दु । उमि ज्याकू वा विमान ब्वयेकेगु खँय् मखुसें व्यक्तिगत खँय् ल्वापु जूगु खयेमाः धाःगु दु ।
LEAVE YOUR COMMENTS