ख्वपयात सांस्कृतिक नगर घोषणा यायेत माग

ख्वप – नेपाल मजदुर किसान पार्टीया सचिवनापं प्रतिनिधिसभा सदस्य प्रेम सुवालं ख्वप देय्यात सांस्कृतिक नगर घोषणा यायेत माग यानादीगु दु । सांसद सुवालं ख्वप देय्यात सांस्कृतिक नगर घोषण याकेगु सम्बन्धय् तःक्वः हे अध्ययन व सिफारिस यायेगु ज्या जुइधुंकूसां आतक थ्व ज्या मजूगु धासें असन्तुष्टि नं प्वंकादिल ।

विश्व सम्पदा दिवसया लसताय् वंगु छुं दिं न्ह्यः ख्वपय् जूगु छगू ज्याझ्वलय् नवासें सांसद सुवालं ख्वप देय्यात सांस्कृतिक नगर घोषणा यायेत सरकारयात माग यानादीगु खः । गुक्वःगु पंचवर्षीय योजना व अन्तरिम योजनाय् तकं ख्वप देय्यात सांस्कृतिक नगरया रुपय् घोषणा यायेगु विषय दुथ्याकूसां सरकारं घोषणा यायेगु ज्याय् ढिलासुस्ती यानाच्वंगु वय्कलं धयादिल ।

ज्याझ्वलय् ख्वप नगरपालिकाया प्रमुख सुनील प्रजापतिं स्थानीय सीप, कला, प्रविधि व स्थानीय हलंज्वलं छ्यलाः पुर्खां दयेकूगु उत्कृष्ट कलाकृति, सम्पदा, सांस्कृतिक धरोहरया उचित सुसाःकुसाः, संरक्षण, संवद्र्धन यानाः युगौंतक जीवन्त याना तयेगु निंतिं ख्वप नगरपालिकां संरक्षणय् प्राथमिकता बिया वयाच्वंगु धयादिल ।

ऐतिहासिक, सांस्कृतिक, पुरातात्विक ल्याखं धनी ख्वप देय्या बारे न्हू पुस्तायात जानकारी बीगु ल्याखं थुगु शैक्षिक दँ निसें हे नगरपालिकां स्थानीय पाठ््यक्रम तयार यानाः लागू यानागु जानकारी वय्कलं बियादिल । ज्याझ्वलय् पुरातत्व विभागया पुलांम्ह महानिर्देशक विष्णुराज कार्की, इतिहास विद् नापं संस्कृतिविद पुरुषोत्तमलोचन श्रेष्ठ, पुरातत्व विभाग ख्वपया प्रमुख मोहनसिंह लामापिंसं नं सम्पदा संरक्षण व संवद्र्धनया थीथी पक्षयात कयाः थःगु नुगःखँ तयादीगु खः ।