
येँ- पाहांचःर्हेया झ्वलय् जात्रा याइपिं स्वम्ह अजिमामध्ये लुमधि अजिमा (वतु भद्रकाली) द्यःयात न्हू दयेकूगु द्यःछेँय् बिज्याकेगु ज्या जूगु दु । वंगु माघ २ गते शुक्रवाः कुन्हु द्यः खलःया मिसापिं जानाः सुकुन्दा च्याकाः द्यःयात लसकुस यासें धार्मिक विधिपूर्वक न्हू दयेकूगु द्यःछेँय् द्यः बिज्याकूगु खः ।
येँ महानगरपालिकाया आर्थिक ग्वाहालिं पुनःनिर्माण सम्पन्न जूगु द्यःछेँय् द्यः बिज्याकूगुया कन्हय्कुन्हु वज्रयानी पुजाविधिकथं द्यःया न्यास पुजा याःगु खःसा उगु पुजा निन्हुतक न्ह्याःगु खः । लिसें उगु इलय् स्वीन्यागू लाख इताः मत नं च्याकूगु खः । थ्व स्वयां न्ह्यः द्यःछेँय् गजू छुइगु नापं पताः छायेगु ज्या नं जूगु खःसा पुलांगु शिलापत्र नं पलिस्था यायेगु ज्या जूगु खः ।
न्हूगु सिँ व दाचि अप्पा तयाः पुलांगु शैलीइ मुक्कं छगू करोड पीगू लाख लागतय् पुनःनिर्माण जूगु याःगु खः । द्यःछेँया पुनःनिर्माणयानिंतिं येँ मनपां ८६ गू लाख स्वीन्याद्वः आर्थिक ग्वाहालि याःगु खःसा ल्यं दुगु ध्यबा जनसहभागितापाखें वःगु जानकारी द्यःछेँ पुनःनिर्माण समितिया छ्याञ्जे दीपक महर्जनं बियादिल ।
न्यास पुजा ज्याझ्वलय् शिक्षा, विज्ञान व प्रविधिमन्त्री कृष्णगोपाल श्रेष्ठ, येँ महानगरपालिकाया प्रमुख विद्यासुन्दर शाक्य, उपप्रमुख हरिप्रभा खड्गी श्रेष्ठ, नेतृ अष्टलक्ष्मी शाक्य, येँ मनपा १५ वडाया नायःलिसें येँ मनपाया प्रवक्ता ईश्वरमान डंगोल लगायत विशिष्टि व्यक्तित्वपिनिगु उपस्थिति दुगु खः । उगु द्यःछेँ वंगु थगुने साउन १४ गते जग स्वनेज्या जूगु खः ।
LEAVE YOUR COMMENTS