न्हय्गुलिं प्रदेशय् न्हूपिं प्रमुख
प्रदेश प्रमुख लिकायेगु ज्यायात विपक्षीपाखें विरोध
येँ – न्हय्गुलिं प्रदेशया प्रमुखतय्त चीकूगुयां २४ घौ दुने हे सरकारं न्हूपिं प्रदेश प्रमुख नियुक्त यायेगु ज्या याःगु दु । तर पुलांगु सरकारं नियुक्त यानातःपिं प्रदेश प्रमुखतय्त आकाझाकां आः वयाः चीकेगु ज्यायात छखे राजनीतिक रूपं विरोध जूगु दुसा मेखे न्हूपिं प्रमुखत नियुक्त यायेगु ज्याया कारणं सत्तारुढ दल नेपाल कम्युनिष्ट पार्टी दुने आन्तरिक कचवं नं शुरु जूगु दु ।
न्हय्गू प्रदेशया प्रमुखत ल्ययेगु ज्या पार्टीया निम्ह अध्यक्षपिं प्रधानमन्त्री केपी शर्मा ओली व पुष्पकमल दाहाल जक च्वनाः यात धासें पार्टीया वरिष्ठ नेता माधव नेपालं असन्तुष्टी प्वंकादीगु दु । न्हय्म्ह प्रदेश प्रमुखपिं मध्ये प्यम्ह ओलीपाखें व स्वम्ह दाहालपाखें ल्यःपिं खः । नेपालयात कोटा मबिउगु खँय् वय्कः तम्वःगु खँ धाःगु दु ।
पार्टीपाखें थःलिसे छुं सल्लाह तकं मयासे प्रदेश प्रमुखत नियुक्त यात धासें पार्टीइ लिखित रुपं हे असन्तुष्टी प्वंकेगु तयारी समेत वय्कलं यानाच्वंगु खँ सीदुगु दु ।
सरकारं न्हूपिं प्रदेश प्रमुखया रूपय्प्रदेश १ य् शर्मिला त्रिपाठी (काठमाडौं), प्रदेश २ लय् धर्मनाथ यादव (सिहारा), प्रदेश ३ य् अमिक शेरचन (चितवन), गण्डकी प्रदेशय् सोमनाथ अधिकारी प्यासी (कास्की), प्रदेश ५ य् बिष्णु प्रसाइँ (झापा), कर्णाली प्रदेशय् तिलक परियार (बाँके) व सुुदुरपश्चिम प्रदेशय् गोविन्द कलौनी (डडेलधुरा) यात नियुक्त यायेगु धकाः राष्ट्रपतियात सिफारिस याःगु दु ।
प्रदेश प्रमुखया नां सरकारं ल्ययेमाः थाय् पार्टीया सचिवालय बैठकं नां निर्णय यानाः पेश याःगु खँय् पार्टीया हे नेता नारायणकाजी श्रेष्ठं विरोध यानादीगु दु । सरकारं यायेमाःगु ज्या पार्टीं यायेगु गलत जूगु तर्क वय्कलं तयादीगु खः । सरकारं बहालवाला प्रदेश प्रमुख–तय्त पदमुक्त याःगुयां कन्हय् कुन्हु हे न्हूपिं प्रदेश प्रमुखत ल्ययेगु ज्या समेत याःगुलिं थ्व नां न्हापा हे क्वःछिनातःगु जुइमाःधकाः नं अनुमान यानाहःगु दु ।
वय्कःपिं सकलें हे पार्टी दुने थीथीकथं योगदान दुपिं खयां नं पार्टीपाखें गनं नं पदय् नियुक्त याये मफयाच्वंपिं खः । वय्कःपिंत व्यवस्थापन यायेगु लागिं नं सरकारं बहालवाला प्रदेश प्रमुखतय्त चीकेगु निर्णय याःगु द्वपं नं बियाहःगु दु ।सिफारिस जूपिं मध्ये त्रिपाठी माओवादी विद्यार्थी नेता ज्ञानेन्द्र त्रिपाठीया जहान खः । त्रिपाठीयात २०६० सालय् येँय् सेनां बेपत्ता याःगु खः ।
प्यासी कास्कीया उपचुनावय् दनेत स्वयाच्वंम्ह खः । शेरचन ताःई न्ह्यवंनिसें पदविहिन जुयाच्वंम्ह खः । प्रदेश प्रमुख चीकेगु ज्यायात प्रमुख प्रतिपक्षी नेपाली कांग्रेसं विरोध याःगु दु । राजनीति स्वयां च्वय् च्वनाः ज्या यायेमाःगु निकायलय् तकं राजनीतिक पूर्वाग्रह तयाः संस्थानया जीएम थें लिकायेगु व तयेगु ज्या यानाः सरकारं गलत नजिर स्थापना यायेत्यन धकाः थुकिया विरोध यानाहःगु खः ।
LEAVE YOUR COMMENTS