अलपत्र नेपाःमिया हक सुरक्षित यायेत उजं
येँ (नेपालभाषा टाइम्स) – राष्ट्रिय मानव अधिकार आयोगं विदेशय् ज्या यानाच्वंपिं नेपाःमित अधिकार सुरक्षित यायेत सरकारयात इनाप याःगु दु। विदेशय् ज्या यानाच्वंपिं आप्रवासी ज्यामिया अधिकार संरक्षण यायेत आयोगं सरकारयात प्रभावकारी पलाः ल्ह्वनेत इनाप याःगु खः ।
म्हिगः ‘कोभिड-१९ महामारीइ लाःपिं नेपाःमि आप्रवासी श्रमिकया अधिकार’ सम्बन्धी अध्ययन प्रतिवेदन सार्वजनिक यासें आयोगं थौंकन्हय् थीथी देशय् ज्या यानाच्वंपिं नेपाःमितय्त यकःति करार भंग यायेगु, बेतलबी बिदाय् च्वनेत बाध्य यायेगु व ज्यां लिकायेगु थेंज्याःगु गैरकानुनी ज्या यानाच्वंगु जूगुलिं उकियात पनेत सरकारं कुटनीतिक पहल यायेत इनाप याःगु खः । आयोगं ज्या याःगु ईया फुक्कं तलब-सुविधा व भुक्तानी मबीगु, ज्यां लिकायेगु, मापदण्ड स्वयां अप्वः ई व जोखिम जुइगु ज्या याकीगु थेंज्याःगु श्रम अधिकार हननपाखें नेपाःया श्रमिकतय्त बचे यायेगु लागिं नं सरकारयात सुझाव बिउगु दु ।
उकथं हे आयोगं आः ज्या यानाच्वंगु देशय् मानव अधिकार व श्रम अधिकार हननय् लानाच्वंपिं तर स्वदेश लिहां वयेगु निंतिं हवाई टिकट लगायतया खर्च थम्हं पुलेमाःपिं श्रमिकयात उगु खर्च शोधभर्ना बीकेगु व्यवस्था यायेत नं आयोगं सिफारिस याःगु दु ।
आयोगं थीथी देशय् तलब व मेमेगु भुक्तानी कायेमखंपिं, ज्यां लिकया हःपिं, बेतलबी बिदाय् छ्वयातःपिं, नेपाः लिहां वयेगु हवाई टिकट मबीगु कम्पनीइ ज्या यानाच्वंपिं श्रमिकयात न्याय बीकेत व क्षतिपूर्तिया कायेत सम्बन्धित देय् या सरकार, रोजगारदाता व नेपाःया कम्पनीयात जिम्मेवार दयेकेत नं सुझाव बियातःगु दु ।
LEAVE YOUR COMMENTS