बेलायतय् नं हन तःजिक न्हूदँ
येँ(नेपालभाषा टाइम्स)÷बेलायतय् च्वंपिं नेवाःतय् संस्था पासा पुचः गुथि युके लन्दनपाखें नं नेपाल संवत् ११४३ न्हूदँ तःजिक हंगु दु । वंगु अक्टोबर २६ कुन्हु लन्दनया इलिङ टाउन हलय् ज्याझ्वः याःगु खः ।
वाङ्मय शताब्दी पुरुष सत्यमोहन जोशीया लुमन्तिइ श्रद्धाञ्जली देछासे न्ह्याःगु ज्याझ्वःया उलेज्या मूपाहां बेलायतया निंतिं नेपाःया राजदूत ज्ञानचन्द्र आचार्य, पासा पुचः गुथि युकेया नायः ओजेश सिंह, पासा पुचः गुथि युके लन्दनया नायः मय्जु रुक्मणि मानन्धरं मंकाःकथं यानादीगु खः । थ्व स्वयां न्ह्यः पासा पुचः गुथि युकेया नायः सिंह व लन्दनया नायः मानन्धरया नेतृत्वय् पिदंगु भिंतुना ¥यालीइ मूपाहांलिसें आपालं पाहांपिंसं ब्वति कयादीगु खः ।
पंचकन्यापाख सकसितं सिन्हः तिकाः सगं बियाः लसकुस याःगु ज्याझ्वलय् स्वनिगःया प्रचलित सांस्कृतिक प्याखं लाखे, भैरव, महाकाली, पुलुकिसिलिसें खोटाङया लाखेप्याखं नं पिथंगु खः ।
उगु इलय् पासा पुचः गुथि युकेपाखें पिथंगु ‘गुथि म्योजिन’ दँपौया मूपाहां राजदूत आचार्य पासा पुचः गुथि युकेया नायः सिंह व लन्दनया नायः मानन्धरं मंकाःकथं पितब्वज्या यानादगिु खः ।
निसत्या स्वयां अप्वःसिनं ब्वति कयादीगु ज्याझ्वलय् सकसितं नेवाः भ्वय् नकूगु खःसा लन्दनया न्वकु प्रनिशा शाक्यं सुभाय् देछानादीगु खः ।
LEAVE YOUR COMMENTS