मोहनियात विशेष सुरक्षा

स्वनिगः त्वःताः पिहां वनीपिंसं प्रहरीयात खबर यायेत इनाप

येँ – न्ह्यःने वयाच्वंगु मोहनि नखःयात ध्यानय् तयाः प्रहरीं स्वनिगः दुने विशेष सुरक्षा योजना न्ह्याकीगु जूगु दु । राजधानी लगायत थीथी थासय् जुइगु छुं नं कथंया घटना वा दुर्घटनायात कयाः तुरुन्त हे एक्सन यायेगु ताः तयाः प्रहरीं थ्व विशेष योजना लागू याःगु खः ।
मोहनिया इलय् स्वनिगःया आपालं मनूत थनया छेँ त्वःताः नखः हनेत पिने वनेगु याइ ।

अज्याःगु अवस्थाय् पिहां वने माःपिं मनूतय्सं थः जःलाखःला वा लिकसं च्वंगु प्रहरी चौकीयात खबर यानाः जक पिहां वनेत नं प्रहरीं इनाप याःगु दु । उमिगु छेँया सुरक्षा यायेगु लागिं नं प्रहरीं विशेष निगरानी तयेगु खँ धाःगु दु । अथे हे मोहनि नखः हनेगु लागिं विदेशं नं आपालं मनूत नेपाः वयेगु याइ ।

खास यानाः भारतं वइपिं नेपाःमितय्त भारतीय सीमाय् पनाः लुटपाट यायेगु व ध्यबा फ्वनेगु ज्या नं याइ । सीमाय् लुटे जुइकाः गुलिखे नेपाःमित खाली ल्हाः हे छेँय् वनेमाःगु अवस्था तकं वयेगु याइ । उमिगु लागिं नेपाल प्रहरीं थुगुसी भारतीय प्रहरीलिसे समेत खँल्हाबल्हा यानाः संयोजन यायेत्यंगु खँ सीदुगु दु ।

मोहनि ताकाय् नेपाल प्रहरी व भारतीय प्रहरीं विशेष निगरानी तयेगु सहमति जूगु खँ धाःगु दु । मोहनि नखः न्ह्यःने वयेवं स्वनिगः दुने लुटपाट व खुया यंकेगु ज्या अप्वया वइ । अज्याःगु इलय् उमित पनेगु लागिं नं विशेष योजना दयेकाः न्ह्याः वनेमाःगु आवश्यकता महसुस यानाः प्रहरीं विशेष पुचःत दयेकाः गस्ती याइगु खँ धाःगु दु ।

थज्याःगु इलय् सादा पोशाकय् समेत प्रशस्त प्रहरीत परिचालन यायेगु खँ नं धाःगु दु । राष्ट्रिय गौरवया ततःधंगु परियोजनात इलय् सम्पन्न जुयाः विकासया गति न्ह्याः मवनाच्वंगु खँयात ध्यानय् तयाः आः थ्व ज्यायात प्रधानमन्त्री थम्हं हे अनुगमन याइगु जूगु दु । थुकिया लागिं मन्त्रिपरिषद् ज्याकुथी छगू बिस्कं क्वथाया व्यवस्था याःगु दुसा प्रधानमन्त्रीं अन हे च्वनाः राष्ट्रिय महत्वया परियोजनात अनुगमन याइगु खँ धाःगु दु ।

उगु कक्षय् च्वनाः प्रधानमन्त्रीं भिडियो मार्फत परियोजनाया अवलोकन यानादी । देशय् थौंकन्हय् सञ्चालन जुयाच्वंगु थीथी ११ गू राष्ट्रिय गौरवया परियोजना प्रधानमन्त्रीं भिडियो मार्फत प्रत्यक्ष अनुगमन यायेगु लागिं थज्याःगु व्यवस्था याःगु खँ धाःगु दु । खतुं अज्याःगु परियोजनाय् ज्या जुयाच्वंगु बारे अनुगमन यायेगु लागिं सम्बद्ध मन्त्रालयतय्सं नं ज्या यानाच्वंगु दु ।

तर मन्त्रालयतय्सं अनुगमन याःसां नं ज्या धाःसा बांलाक मन्ह्याःगु जुयाः अज्याःगु अनुगमनया नं अनुगमन यायेगु लागिं प्रधानमन्त्रीपाखें थ्व पलाः ल्ह्वंगु खँ धाःगु दु । अज्याःगु भिडियो अनुगमनपाखें प्रधानमन्त्रीं चाहे जुल धाःसा आयोजना प्रमुख वा अन ज्या यानाच्वंपिं सुं नं मनूलिसे प्रत्यक्ष खँल्हाबल्हा समेत यायेफइगु खँ नं धाःगु दु ।

प्रधानमन्त्री थः हे आयोजनास्थल तक वने फइगु सम्भावना मदुगु जुयाः वय्कःयात अज्याःगु आयोजनास्थलया प्रत्यक्ष निगरानी याकेगु लागिं नं थ्व व्यवस्था याःगु खः । प्रधानमन्त्री लगायत येँय् उपलब्ध आयोजनालिसे आवद्ध मनूत समेत च्वनाः अज्याःगु भिडियो अवलोकन याइगु ग्वसाः दु ।

नेपाःया विकासया ख्वाःपाः अज्याःगु राष्ट्रिय गौरवया परियोजनात सम्पन्न जुल धाःसा हिलीगु आशा जुयाच्वंगु दु । तर अज्याःगु ज्या तकं इलय् सिमधःगु जुयाः देशय् आशा यानातः कथं विकासया गति न्ह्याये फयाच्वंगु मदुनि । अज्याःगु आयोजनाया ज्या गुलि सिधल धइगु खँ वइबलय् अनुमानया भरय् जक मखु कि तप्यंक तथ्यया आधारय् धाये फयेमा धकाः नं प्रधानमन्त्रीं थ्व व्यवस्था याके बिउगु खँ धाःगु दु ।

अज्याःगु निरीक्षण लिपा प्रधानमन्त्रीपाखें तप्यंक उकी आवश्यक निर्देशन समेत बी फइगु खँ नं धाःगु दु । लिसें प्रधानमन्त्रीया तप्यंक निगरानीइ दुगु जुयाः आवश्यक जूगु निर्णय नं प्रधानमन्त्रीं याये फइगु खँ नं धाःगु दु । थज्याःगु राष्ट्रिय गौरवया आयोजनाय् जलविद्युत, सतक, विमानस्थल निर्माण थेंज्याःगु तःधंगु आयोजनात दुथ्याः । थीथी कारण क्यनाः बियातःगु ई पुला वनेधुंकूसां नं उकिया ज्या धाःसा सिधयाच्वंगु मदुनि ।

पेस्तोल सहित प्यम्ह ज्वन
येँय् पेस्तोल सहित प्यम्हेसित प्रहरीं ज्वंगु दु । बुधवाः सुथय् ११ बजे येँ महानगरपालिका–९ शम्भुमार्गस्थित एभरेष्ट होलिडे इन होटलया क्वथा नम्बर ४०४ पाखें प्यम्हेसित ज्वंगु खँ महानगरीय प्रहरी कार्यालय रानीपोखरीं धाःगु दु । ज्वंपिं भीम सुर्खेती, भीमबहादुर माझी, प्रदीप माझी व लोकेन्द्रबहादुर आले खः । उमिगुपाखें प्रहरीं छपु पेस्तोल, छगः म्यागेजिन, पेस्तोलया खुगः गोली बरामद याःगु दु ।

सम्बन्धित बुखँ

LEAVE YOUR COMMENTS