ने. सं. ११४४ कौलाथ्व पारू - नःलास्वनेगु

मानन्धर संघया झिन्हुया क्षमता विकास तालिम क्वचाल

येँ (नेपालभाषा टाइम्स)- केन्द्रीय मानन्धर संघं बिया वयाच्वंगु झिन्हुया क्षमता विकास तालिम क्वचाःगु दु । येँ महानगरपालिकाया सहकार्यय् चस्वांद्वं मानन्धर सनाःगू खलःया छेँय् जूगु तालिमय् नेतृत्व विका निसें ज्याझ्वः संचालन सम्बन्धी तालिम बिउगु खः ।

ज्याझ्वःया संयोजक अनुसुया मानन्धरया कथं तालिमय् गृहिणी मिस्त लिसें ल्याय््म्ह, इन्जिनियरि, कानुनया विद्यार्थी लिसें उद्यमी, व्यवसायी, शिक्षिकापिं यानाः ३५ म्हेसित ब्वति काःगु खः । झिंप्यदँ निसें न्हयेदँ उमेर तकयापिं प्रशिक्षार्थी दुथ्याःगु तालिमय् संचारकर्मी केके मानन्धरं प्रशिक्षण बियादीगु खःसा सिटीइभिटीईया एसेसर म्यानेजर सुमिना मानन्धर व रेडियोकर्मी सुरेन्द्र मानन्धरं सहजीकरण याःगु खः ।

समापन ज्याझ्वलय् न्ववासें येँ महानगरपालिका १९ वडाया अध्यक्ष राजेश श्रेष्ठं गृहिणी मिस्तय् नं क्षमता विकास बः बीमाःगु खँ न्ह्यथँसें थज्याःगु तालिमं मिस्तय्त थीथी क्षेत्रय् सक्षम यायेत तिबः बीगु खँ धयादिल । ज्याझ्वलय् केन्द्रीय मानन्धर संघया सभापति मनोजकुमार मानन्धर, निवर्तमान सभापति गोपालकृष्ण मानन्धर, उपसभापति बद्रीनारायण मानन्धर, सचिव गजेन्द्रमान मानन्धरपिंसं थःथःगु बिचाः तयादीगु खः ।

वि.सं. २०१० य् स्थापित संघं थुगुसी जक येँ महानगरपालिकाया सहकार्यय् धाः बाजं प्रदर्शनी यायेधुंकूगु दुसा आः उद्यमशीलता, शीप व क्षमता विकासया तालिम निरन्तर न्ह्याकेगु ज्याझ्वः तयातःगु दु ।