गुथि अस्ट्रेलियाय् महर्जनया नेतृत्वय् न्हूगु ज्यासा पुचः

येँ (नेपालभाषा टाइम्स) – अस्ट्रेलियाय् च्वनाच्वंपिं नेवाःतय् संगठन गुथि अस्ट्रेलियाया आः नकतिनि जूगु साधारणसभां न्हूगु ज्यासना पुचः ल्यःगु दु ।

उगु साधारणसभां अनुप महर्जनया अध्यक्षताय् न्हूगु ज्यासना पुचः ल्यःगु खः । अस्ट्रेलियाया सिड्नीइ च्वंगु संस्थाया न्हूगु ज्यासना पुचलय् विश्वास श्रेष्ठ न्वकु, अजय देशार मूछ्याञ्जे, उमेश नापित दांभरिंकथं च्वनादीगु दु ।

झिंप्म्हेसिया उगु ज्यासना पुचःया दुजलय् नरेश अवाल, कुन्दन ताम्राकार, जेनिस मास्के, प्रवेश डंगोल, सुविन श्रेष्ठ, बुकेश महर्जन, सुशील सिंह, सुरज प्रधान, सविन श्रेष्ठ, मोनिका श्रेष्ठ, शैलेश श्रेष्ठ, सिजनमान ताम्राकार व आशिषमान सिंह च्वनादीगु दु ।

संस्थाया निवर्तमान नायः शिव श्रेष्ठया सभापतित्वय् जूगु ज्याझ्वलय् वय्कलं न्हूगु ज्यासना पुचःयात नं थःगु कार्यकालय् थें सकसिनं ग्वाहालि याइगु आशा यासें न्हूगु ज्यासना पुचःयात भिंतुना बियादिल । संस्थाया हरेक ज्याझ्वःयात मदिक्क ग्वाहालि याना वयाच्वंगु मेट्रो होम्सया प्रमुख कार्यकारी अधिकृत ज्ञानेन्द्र कार्की व निर्देशक सज्जन कार्कीयात नं उगु इलय् मतिना चिं लःल्हासे सम्मान याःगु खः ।

न्हूगु ज्यासना पुचः ल्ययेत नेपाल आदिवासी जनजाति मञ्च अस्ट्रेलियाया नायः अरुण तामांगया संयोजकत्वय् निर्वाचन कमिटी गठन याःगु खः।