मदुम्ह पत्रकार विक्रमया छेँजःयात ग्वाहालि

यल (नेपालभाषा टाइम्स) – नेपाली कांग्रेस यल महानगरपालिका १६वडा इकाईपाखें मदुम्ह पत्रकार विक्रम शाक्यया छेँजःयात आर्थिक ग्वाहालि याःगु दु। इकाईपाखें मदुम्ह पत्रकार शाक्यया छेँजःयात आर्थिक ग्वाहालिकथं झिद्वः तका दां लःल्हागु खः ।

इकाई सभापति रविन्द्र शाक्यं मदुम्ह शाक्यया जहान धन शाक्ययात उगु आर्थिक ग्वाहालि लःल्हानादीगु खः । वडा ज्याकुथिइ हे जूगु बःचाधंगु ज्याझ्वलय् यल महानगरपालिका २० वडाअध्यक्ष चन्द्र महर्जन, नेवाः पत्रकार राष्ट्रिय दबूया नायः सुरजवीर वज्राचार्य, इकाई सचिव प्रताप शाक्य वडासदस्य धनकाजी शाक्य लगायतया उपस्थिति दुगु खः ।

भाषा, लिपि, बौद्ध धर्म, संस्कृति, सम्पदा लगायतया विषययात कयाः छापा व विद्युतीय संचारमाध्यमं प्रचार प्रसार यायेगु ज्याय् आपालं योगदान बियादीम्ह पत्रकार शाक्य वंगु असोज १५ गते मदुगु खः ।