थिमिया मेयरयात आक्रमण याःपिं सु ?

थिमि – मध्यपुर थिमि नगरपालिकाया मेयर मदनसुन्दर श्रेष्ठयात सांघातिक आक्रमण याःपिं आक्रमणकारीत याकनं हे ज्वने फइगु खँ प्रहरी सूत्रं धाःगु दु । शनिवाः मेयर श्रेष्ठया छेँय् हे आक्रमण यानाः वय्कःयात घाःपाः याना थकूगु खः । वय्कःया छेँय् दुगु सीसीटिभीया फुटेजपाखें आक्रमणकारीत पत्ता लगे यायेधुनागु व उमित याकनं हे ज्वने फइगु खँ नं प्रहरी सूत्रं धाःगु दु ।

थ्व आक्रमणय् विप्लव माओवादीया छुं कार्यकर्तातय् ल्हाः दुगु आशंका याःगु दु । थुकी उगु पार्टीया कार्यकर्तातय्सं संस्थागत मखुसें व्यक्तिगत इबि तयाः आक्रमण याःगु अनुमान नं प्रहरीं याःगु दु । घाःपाः जूम्ह मेयर श्रेष्ठयात आः थिमिया नेपाल–कोरिया अस्पतालय् वासः याकातःगु दु ।

आक्रमणकारीतय्सं वय्कःयात छ्यनय् हे छडं प्रहार याःगु खःसा वय्कलं ल्हातं पंगुलिं बचे जुयादीगु खः । वय्कःयात आक्रमण याःगु विरुद्ध म्हीग नगरपालिकाय् ज्या ठप्प याःगु खःसां थुकिं सेवाग्राहीयात मर्का जुइ धकाः म्हिगःनिसें हानं शुरु याःगु दु । थ्व आक्रमणया विरुद्ध ख्वप जिल्लाया थीथी पार्टी कमिटी व निकायतय्सं प्रमुख जिल्ला अधिकारीयात ज्ञापनपौ लःल्हाःगु दु ।