भाषा सम्बन्धी विधेयक ः कानुन बल्लाकेत थीथी संशोधन

येँ (नेपालभाषा टाइम्स)- बागमती प्रदेश सभाय् पेश जूगु सरकारी भाषा सम्बन्धी विधेयकय् म्हिगः थीथी सांसदतय्सं संशोधन प्रस्ताव दर्ता याःगु दु । सरकारं पेश याःगु थ्व विधेयकय् संशोधन प्रस्ताव तयेत ७२ घौया ई बियातःगु खःसा थौं थ्व ई पूवनी ।

म्हिगः संशोधन दर्ता यानादीम्ह नेकपा (एकीकृत समाजवादी) या सांसद बसन्त मानन्धरया कथं म्हिगः जक झिम्ह स्वयां अप्वः सांसदतय्सं संशोधन दर्ता याःगु दु ।
थुकी यक्वयां संशोधन दर्ता याःसां विधेयकया विरोधय् मखुसें थुकियात अझ बल्लाकेगु व स्पष्ट यायेगु कथंया संशोधन प्रस्ताव वःगु खँ धाःगु दु । विधेयकय् नेपालभाषा व तामाङ भाषाया खँ जक दुथ्याःगु जुयाः मेमेगु भाषाया सवालय् छु यायेगु धकाः नं न्ह्यसः पिहां वःगु खँ धाःगु दु । अथे खःसां विधेयक बारे सुयां विरोध धाःसा मदुगु खँ धाःगु दु । थ्व विधेयक सर्वसम्मत ढंगं हे पास जुइगु सम्भावना दु । तर विधेयक पास जूसां उकिया कार्यान्वयन पक्षय् धाःसा सकस्यां मेहनत याये मालीगु खँ नं सांसद मानन्धरं कनादिल ।

विधयेक दर्ता जुइवं थुकिया बारे सहलह यायेत नेवाः देय् दबूया छगू पुचः म्हीग प्रदेश राजधानी हेटौंडा वंगु खःसा म्हिगः प्रदेशया सांसदतलिसे सहलह ब्याकूगु खः । सहलह ज्याझ्वलय् नेवाः व तामाङ सांसदतय्सं ब्वति काःगु खः । उगु सहलह ज्याझ्वलय् निगुलिं भाषा बारे ज्या यायेगु लागिं प्रतिष्ठान गठन यायेगु धकाः पुलांगु मस्यौदाय् च्वया तःगु दुसां आः विज्ञ पुचः जक गठन यायेगु धाःगुलिं उकियात संशोधन यायेमाःगु व विभेद याइपिंत कारवाही यायेमाःगु खँ नं धाःगु दु । थ्व विधेयकय् वःगु संशोधन प्रस्ताव बारे आः प्रदेश मामिला समितिइ यंकाः सहलह याइ ।

थ्वहे झ्वलय् म्हिगः च्वनेमाःगु बागमती प्रदेशसभाया बैठक आकाझाकां स्थगित जूगु दु । म्हिगः २ बजे प्रदेशसभा बैठक च्वनेगु कार्यतालिका दयेकातःगु खःसां नेकपा एमालें अवरोध यायेफइगु आशंका यासें बैठक स्थगित याःगु खः । म्हिगः च्वनेमफुगु बैठक थौं च्वनेगु धाःसां थौं नं एमालेया कारणं बैठक च्वनीगु सम्भावना मदुगु खँ धाःगु दु । एमालें सरकारं हःगु प्रदेशस्तरया चिट्ठा व्यवस्थापन तथा नियन्त्रण सम्बन्धी विधेयक प्रक्रिया मिचे यानाः हःगु धासें विरोध याना वयाच्वंगु खः । एमालें उगु विधेयक प्रक्रियागत ढंगं हयेमाःगु माग याना वयाच्वंगु दु । एमालें थःगु माग पूमवंतले प्रदेशसभाया बैठक न्ह्याके मबीगु अडान कयाच्वंगु दु ।