ज्यापु विकास कोषपाखें गुरुपिंत सम्मान
येँ (नेपालभाषा टाइम्स)- गुरुपुन्हिया लसताय् ज्यापुतय् परम्परागत ख्वीस्वंगू त्वाःया बाजं गुरुपिंत हनेज्या याःगु दु । ज्यापु संस्कृति विकास कोषया ग्वसालय् आइतवाः क्षेत्रपाटी पार्टी प्यालेसय् छगू ज्याझ्वःया दथुइ बाजं गुरुपिंत हाकुतपुलिं पुइकाः ख्येँ सगं बियाः हनेज्या याःगु खः ।
ज्याझ्वलय् मू पाहाँ येँ महानगरपालिकाया उपमेयर सुनिता डंगोलं बाजंगुरुपिंत हाकु तपुलिं पुइकाः कोषया नायः मंगलकृष्ण सिंह स्वांमाः क्वखायेकाः हनादीगु खः । अथेहे ज्याझ्वलय् खुइस्वंगू त्वाःया त्वाः न्याःपिंत नं स्वांमाः क्वखायेकाः ख्येँ सगं बियाः हनेज्या याःगु खः ।
थुगु हे ज्याझ्वलय् नीछक्वःगु ज्यापु दिवस हनेगु निंतिं पाब्व नं लःल्हाःगु खः । ज्याझ्वलय् नीक्वःगु ज्यापु दिवस हंगु त्यंगः त्वाः खलःया नायः धनबहादुर महर्जनं आः पाःब्वः काःगु नित्यनाथ छुट गुथि वतु त्वाःया नायः सानुकाजी महर्जनयात पाःब्वः लःहानादीगु खः । पाःब्वः काःगु खलःयात कोषपाखें निगू लाख दां नं लःल्हाःगु खः ।
कोषया अध्यक्ष सिंहया सभापतित्वय् जूगु ज्याझ्वलय् लसकुस यानादिसें कोषया उपाध्यक्ष सन्त महर्जनं कोषं याना वयाच्वंगु गतिविधियात कयाः जानकारी बियादीगु खःसा अध्यक्ष सिंह कोषया अवधारणा बारे न्ववानादीगु खः । ज्याझ्वलय् मूपाहाँ उपमेयर महर्जन लिसें येँ महानगरपालिकाया सम्पदा विभागया संयोजक व ८ वडाया अध्यक्ष आशामान संगत, ज्यापु महागुथिया कार्यवाहक अध्यक्ष ज्ञानेन्द्र महर्जन, त्यंगः त्वाःया नायm धनबहादुर महर्जन, वतु त्वाःया अध्यक्ष सानुकाजी महर्जनपिंसं नं न्ववानादीगु खः ।
LEAVE YOUR COMMENTS