ने. सं. ११४६ अनलाथ्व दशमी -

कन्हय्निसें सरकारी अस्पताल ठप्प

येँ – सरकारी डाक्टरतय्सं कन्हय्बुधवाःनिसें देय्न्यंकंया अस्पतालय् आकस्मिक सेवा बाहेकया मेगु फुक्कं सेवा बहिष्कार यायेगु घोषणा याःगु दु । सरकारी चिकित्सक समायोजनया विषयय् थःपिनिगु माग पूमवंकूगु धासें डाक्टरतय्सं आकस्मिक बाहेक फुक्कं सेवा बहिष्कार यायेगु ज्याझ्वः पित हःगु खः ।

सरकारी चिकित्सक संघ (गोदानं) फुक्कं सेवा ठप्प यायेगु धासें बुधवाः कुन्हु हे लाःगु स्वास्थ्य सेवा दिवसया ज्याझ्वः नं थःपिंसं बहिष्कार यायेगु खँ धाःगु दु । थःपिंसं सरकारयात ७२ घौया अल्टिमेटम बियागु व माग पूमवन धाःसा सेवा बहिष्कार यायेत थःपिं बाध्य जुइगु खँ धाःगु दु । म्हिगः स्वास्थ्य राज्यमन्त्री डा. सुरेन्द्र यादव लिसे सरकारी चिकित्सक संघया प्रतिनिधि दथुइ जूगु वार्ता बिना निष्कर्ष क्वःचाःगु खः ।