येँ व किपूया वडा दथुइ कचवं
किपुलिं बल्खु मिचे याःगुलिं लः दुहां वःगु द्वपं
येँ – वंगु छुं न्हि लगातार वःगु वां यानाः येँ मनपा १४ वडाय् लाःगु बल्खु खुसि बाः वयाः आपालं धनसम्पत्ति नोक्सान जुइवं उगु खुसि मिचे यानाः पःखाः दना हःगु धासें येँ मनपाया वडा १४ व किपू नगरपालिकाया वडा नम्बर ४ दथुइ विवाद ब्वलंगु दु । येँया १४ वडाय् लाःगु मालपोत ज्याकू न्ह्यःनेया बल्खु खुसि बाः वयाः उगु लागाय् यक्व नोक्सान जूगु खः ।
१४ वडाया वडा अध्यक्ष शोभा सापकोटां खुसिया पारी किपू नपाया वडा ४ पाखें खुसि हे मिचे यानाः वाल दयेका हःगु कारणं थःगु वडाय् लः दुहां वःगु द्वपं बियादीगु दु । किपू नपापाखें छुं ई न्ह्यः अन खुसि सिथय् पःखाः दना हःगु खः । थःगु लागाया जग्गा बचे यायेगु नामय् किपूपाखें खुसिया सीमा हे मिचे जुइक पःखाः दना हःगु जुयाः आः लः बढे जुइवं उगु लः फुक्क थःगु वडाय् दुहां वःगु द्वपं वय्कलं बियादिल ।
म्हिगः किपू नपा ४ वडाया अध्यक्षयात थुकिया बारे वार्ता यायेत सःतागु खःसां थःगु वडाया पीडितत तंचायाः वयाच्वंगु खनाः अनया वडा अध्यक्ष वार्ताय् मवःगु खँ वय्कलं कनादिल । किपूया हे कारणं थःगु वडाय् खुसि दुहां वःगु धकाः थम्हं किपूया वडा अध्यक्ष व उपमेयरयात खबर यायेधुनागु खँ नं कनादिल ।
आः थःपिंसं किपू नपां खुसि सिथय् दयेकातःगु पःखाः थुना छ्वयेगु तयारी यानाच्वनागु जानकारी नं वय्कलं बियादिल । स्थानीय जनतां आः किपूपाखेया पःखाःथुना हे छ्वयेमाः धकाः सः तयाच्वंगु जुयाः थःपिंसं नं अथे हे यायेगु खँ वय्कलं कनादिल ।
बल्खु बाः वयाः म्हीग १४ वडाया करिब ५०० खा छेँ डुबानय् लाःगु खःसा उकी लानाः अन च्वंगु छगू सरकारी स्कुल, वडा कार्यालय, प्रहरीया ज्याकू व छगू कोलोनी डुबे जूगु खः ।
सीपिनि ल्याः ६० थ्यन
वंगु विहीवाःनिसें वःगु खुसिबाः व चलखं यानाः देय्न्यंकं सीपिनि ल्याः ६० म्ह थ्यंगु दु । सीपिं मध्ये २४ म्ह मिसापिं दुसा ३६ म्ह मिजंपिं दुगु खँ नेपाल प्रहरीं धाःगु दु । अथे हे प्रहरीया कथं १७ म्ह मिसा व २१ म्ह मिजंपिं घाःपाः जूगु दु । उकथं हे १२ म्ह मिसा व १४ म्ह मिजंत बेपत्ता जुयाच्वंगु दु । आः तक खुसिबालं पीडित जूपिं ११४४ म्हेसित सकुशल उद्धार यानागु खँ प्रहरीं धाःगु दु ।
नेपाल सरकारया म्हिगः च्वंगु आकस्मिक क्याबिनेट बैठकं खुसिबालं पीडित जूपिनि उद्धारया लागिं सम्पूर्ण व्यवस्था यायेगु निर्णय याःगु दु । राज्यया फुक्क हे निकाययात उद्धारया ज्याय् खटे यायेगु निर्णय यासें घाःपाः जूपिंत राहत बीगु सम्पूर्ण व्यवस्था सरकारं यायेगु निर्णय नं याःगु दु ।
LEAVE YOUR COMMENTS