बँ पसः तयेके हे मबीगु बालेनया अडान
येँ (नेपालभाषा टाइम्स)÷ येँ महानगरपालिकाया मेयर बालेन साहं फुटपाथ पसः तइपिंत वैकल्पिक व्यवस्था यायेमाःगु मागयात थःपिंसं सम्बोधन याये मफइगु खँ धयादीगु दु । म्हिगः सामाजिक सञ्जालय् न्हय्गू बुँदाया छगू पोष्ट यासें मेयर साहं फुटपाथ, लँया राइट अफ वे दुने जुइगु व्यापार गैरकानुनी जुइ धयादीगु दु ।
वय्कलं थुगु बाध्यताया खँय् भावुक जुइ फइ तर कानुनं स्वयेगु खःसा कानुन स्वयां फरक सुं नं मखु धयादीगु दु ।
अथे हे व्यापारीया माग कथं सुथय् बहनी निघौ व्यापार याये दयेमाः धइगु मागय् नं वय्कलं धयादीगु दु– उगु ई मस्त, दृष्टिविहीन, बिरामी न्यासि वनेगु व मिं नइगु घटना जुल धाःसा अज्याःगु आपतकालीन इलय् फुटपाथया पसः व ठेलां पंगः थनीगु खतरा दु ।
फुटपाथ बाहेक मेगु सार्वजनिक थाय् कानुन कथं बी फइ मखु धासें सार्वजनिक जग्गा मेयरं जक मखु प्रधानमन्त्री व मन्त्रिपरिषदं नं आःया ऐन कानुन कथं बी फइगु अवस्था मदुगु खँ नं नं वय्कलं धयादीगु दु । सरकारलिसे जानाः फटपाथ व्यापारीयात भृकुटी मण्डपय् व्यवस्थापन याःगु खःसां नं फुटपाथ खाली मजूगु धासें वय्कलं सरकारया सरकारी जग्गा बीगु अधिकार महानगरयाके मदुगु जुयाः आन्दोलनकारीया माग पूवंकेगु अधिकार थःपिंके मदुगु खँ नं स्पष्ट यानादीगु दु ।
फुटपाथ व्यवसाययात व्यवस्थित यायेमाःगु माग यासें राष्ट्रिय सभागृह न्ह्यःने धर्ना बियाच्वंम्ह अभियन्ता ‘ई’ या समर्थनय् फुटपाथ व्यवसायीत नं सतकय् कुहां वःगु खः । व्यवसायीतय्सं म्हिगः थीथी नारा च्वयातःगु प्लेकार्ड ज्वनाः ईया समर्थनय् प्रदर्शन याःगु खः ।
प्रदर्शनया झ्वलय् ‘गरिबमारा कामनपा, जिमित सासः ल्हायेगु तकं थाय् मबिसे छु दइ ?, ‘बालेन सुनिता छिमित मत व तिबः बियागु जिमिगु गल्ती हे खः ला ?’, ‘मारपिट लुटपाट बन्द या, गरिब, सतक, मजदुर, उद्यमी मखु गरिबी चीकि’ धइगु प्लेकार्ड ब्वःगु खः ।
अभियन्ता ‘ई’ व महानगरपालिकाया प्रतिनिधि दथुइ म्हीग मंगलवाः न्याघौ तक वार्ता जूगु खःसां उगु वार्ता ताः लाये धाःसा मफुगु खः । व्यवसायीतय्सं न्हापा व्यापार यानाच्वंगु हे थासय् हानं फुटपाथ पसः तये दयेमाः धकाः माग यायेवं वार्ता असफल जूगु खः । उमिसं मोहनि स्वन्ति नखः न्ह्यःने वयाच्वंगुलिं पुलांगु थासय् व्यापार याये दयेमाःगु माग याःगु खः ।
LEAVE YOUR COMMENTS