पहिचान आन्दोलनयात गलत द्वपं

येँ (नेपालभाषा टाइम्स)÷पुलांम्ह प्रधानमन्त्री लिसें नेकपा (एमाले)या अध्यक्ष केपी ओलीं प्रदेश नं. १ य् कोशी प्रदेश नामाकरण विरुद्ध आन्दोलन यानाच्वंपिं पहिचानवादीतय्त पुलांम्ह जुजु ज्ञानेन्द्र शाहं परिचालन यानातःपिं धकाः बियादीगु द्वपंयात पहिचानवादी शक्तितय्सं घोर विरोध याःगु दु । लिसें वय्कलं छु आधारय् थज्याःगु द्वपं बियादीगु खः धासें आश्चर्य प्वंकुसें फुसा उकिया प्रमाण बिउ धकाः नं ओलीयात हाथ्या बिउगु दु ।

अध्यक्ष ओलीं थःत झापाय् जूगु अप्पा प्रहारयात समर्थन याये थें हिमानी शाहया नामं चायेकातःगु छगू फेसबुक एकाउन्टं टिप्पणी याना हयेवं पुलांम्ह जुजु विरुद्ध न्ववायेगु शुरु याना हःगु खः । तर उगु फेसबुक एकाउन्ट हिमानी शाहयागु मखु धइगु खँ सार्वजनिक जुइधुंकाः नं वय्कलं हानं लिसा कयाः पुलांम्ह जुजुयात हे द्वपं बियाः पहिचान पक्षधर आन्दोलनया आलोचना याना च्वनादीगु दु ।

विश्लेषकतय्सं धाः कथं नेपाःया आः दुपिं तःधंगु पार्टीत मध्ये पुलांम्ह जुजु ज्ञानेन्द्र शाहलिसे दकलय् सतीगु स्वापू दुम्ह नेता केपी ओली हे खः । छाय्धाःसां देशय् राजतन्त्र पुनस्र्थापना यायेमाः धइगु एजेन्डायात मूल रुपं क्वबियाच्वंगु पार्टी राप्रपालिसे एमालेया क्वातुगु स्वापू दु । चुनावय् नं एमाले व राप्रपाया दथुइ हे गठबन्धन जूगु खःसा आः नं पुष्पकमल दाहालयात सरकारयात एमाले व राप्रपां हे समर्थन मयासे च्वनाच्वंगु दु । तर ओलीं आः वयाः वहे राप्रपाया मुख्य एजेण्डा जुयाच्वंम्ह पुलांम्ह जुजुं थःत आक्रमण याकल धकाः द्वपं बियाहःगु खनाः राप्रपा दुने नं अन्यौल ब्वलंगु खँ धाःगु दु ।

मेखे आन्दोलनरत पहिचानवादीतय्सं नं थःपिंत ओलीं पुलांम्ह जुजुलिसे स्वानाः आलोचना याना हःगुलिं थःपिं व पुलांम्ह जुजुया स्वापूया छुं प्रमाण दुसा पेश या धकाः हाथ्या बियाहःगु दु । पहिचानवादीतय्सं केपी ओली हानं छक्वः फय्गं सुचंया शिकार जूगु व उकिया हे आधारय् गलत विश्लेषण याना हःगु खँ नं धयाहःगु दु ।

प्रदेशन्यंकं आन्दोलन तच्वयेकीगु
प्रदेश १ या नां ‘कोशी प्रदेश’ तःगु विरुद्ध आन्दोलन यानाच्वंपिं पूर्वी नेपाःया पहिचानवादी आन्दोलनकारीतय्सं आः प्रदेशन्यंकं हे आन्दोलन विस्तार याना यंकेगु तयारी यानाच्वंगु खँ सीदुगु दु । थौंकन्हय् प्रदेशया राजधानी विराटनगर लगायत ताप्लेजुङ, पाँचथर, इलाम आदि लागाय् जक सञ्चालन जुयाच्वंगु आन्दोलनयात आः प्रदेशन्यंकं विस्तार यायेगु तयारी यानाच्वंगु दु ।

थुकिया लागिं प्रदेश नं. १ पुनः नामाकरण संयुक्त संघर्ष समितिं लडाकु शैलीया कार्यकर्तात नं तालिम बियाः तयार यानाच्वंगु खँ सीदुगु दु । ल्याय्म्हत जक च्वनाः दयेकूगु अज्याःगु फोर्सयात थौंकन्हय् भूतपूर्व सैनिकतय्सं वयाः तालिम बियाच्वंगु खँ नं धाःगु दु । आन्दोलनयात छुं नं कथंया भडकाउपाखें मुक्त यायेत नियमित रुपं बैठक च्वनाः विज्ञतय्गु सल्लाह सुझाव कायेगु ज्या नं यानाच्वंगु खँ धाःगु दु ।