स्वन्ति झालय् मदुपिं भाषाख्यःया जःपिं

येँ (नेपालभाषा टाइम्स) – वंगु स्वन्ति झालय् नेवाः ख्यःया थीथी व्यक्तित्वपिं मदुगु लिसें शोकं कःगु दु । येँ देय्या वज्राचार्य गुरुजुपिं मध्ये दकलय् थँजिम्ह देथाय्पाः (मूलचक्रेश्वर) प्रा. धूपरत्न वज्राचार्य वंगु कौलागा आमाइ आइतवाः लक्ष्मीपुजा कुन्हु दिवंगत जूगु दु । वसपोलया अन्त्येष्टी सोमवाः पारु कुन्हु कर्णदिपय् वज्रयानी बौद्ध परम्पराकथं जुल । वसपोल मैत्रीपुर महाविहार (क्वाबहाः) या चक्रेश्वर नं खः । वसपोलया जन्म ने.सं. १०४७ य् जूगु खःसा २०१२ सालं निसें त्रिविविइ प्राध्यापन यानादीगु खः । वय्कःया तिरिमयजु ज्ञानीशोभा वज्राचार्य कतिंपुन्हि कुन्हु जक मदुगु खः । वय्कःया स्वम्ह म्ह्याय्पिं दी ।

अथे हे नेपाल सरकारया पुलांम्ह सचिव लिसें नेपालभाषाया च्वमि जितबहादुर मानन्धर कार्तिक २५ गते मन्त । वय्कः ८६ दँ दुम्ह खः । वय्कः कोरोना ल्वचं कयाः मदुगु खँ वय्कःया छेँजःपिंसं धाःगु दु। च्वमि मानन्धरं नेपालभाषाय् ‘मानन्धर निबन्ध मुना’ लिसें आपालं फुटकर च्वसुत च्वयादीगु दुसा खस नेपाली व अंग्रेजी भासं नं थीथी च्वसुत च्वयादीगु दु। वय्कःया जहान लिसें काय निम्ह व म्ह्याय् छम्ह दी ।

उकथं हे रत्नकेतु महाबिहार झ्वाःबहाःया थाय्पा फणिन्द्ररत्न वज्राचार्यया जहान रत्नशोभा बज्राचार्य कछलाथ्व चौथी कुन्हु मन्त । ताःई निसें बिरामी जुयाः छेँय् वासः याका च्वनादीम्ह वय्कः ८८ दँ दुम्ह खः । मदुम्ह बज्राचार्यया येँया कर्णदिपय् अन्तिम संस्कार याःगु खः । वय्कःया प्यम्ह काय् व छम्ह म्ह्याय् दी ।

स्वन्ति झालय् हे येँ मनपा २८ वडाया पुलांम्ह वडाध्यक्ष सुभानकुमार श्रेष्ठया जहान मय्जु संगीता श्रेष्ठ नं मन्त। वय्कः कछलाथ्व पंचमि कुन्हु थनया नेशनल अस्पतालय् वासः याकुयाकुं मदुगु खः । मदुम्ह श्रेष्ठया छम्ह म्ह्याय् दी । मदुम्ह श्रेष्ठ २८ वडाय् अतिकं सक्रिय समाजसेवी लिसें नेपालभाषा ख्यःया कार्यकर्ता नं खः ।