रत्नपार्क–ख्वप द्रुत बस सेवा

येँ (नेपालभाषा टाइम्स)- सूर्य विनायक–रत्नपार्क ‘द्रुत बस सेवा’ सञ्चालनया नितिं सतकय् ‘डेडिकेटेड लेन’ दयेकेगु ज्या न्ह्याःगु दु । सतक डिभिजन कार्यालयं द्रुत बस सेवा सञ्चालनया नितिं ‘रेडमार्क’ दयेकेगु ज्या न्ह्याकूगु खः ।

भौतिक पूर्वाधार तथा यातायात मन्त्री प्रकाश ज्वालां वंगु असोज ३ गते द्रुत बस सेवा न्ह्याकेत निर्देशन बियादीगु खःसा वहे कथं आः थुकिया ज्या न्ह्याकूगु खः । यातायात व्यवस्था विभागं द्रुत बस सेवाया नितिं नीन्यागः बस तयारी अवस्थाय् तयातःगु दु ।

आः स्वन्हुया दुने रत्नपार्कंनिसें सूर्य विनायक तक डेडिकेटेड लेनया ज्या क्वचायेकेगु तयारी जुयाच्वंगु दु । विभागं निगू खण्ड दयेकाः रेडमार्क तयेगु ज्या न्ह्याकूगु खः । रत्नपार्कंनिसें जडिबुटी व जडिबुटीं सूर्यविनायक तक द्रुत मार्ग (एक्स्प्रेस) दयेकेगु ज्या न्ह्याकूगु खः ।

सुथय् व सन्ध्या इलय् अफिस टाइम क्वचाइगु इलय् स्वनिगलय् ट्राफिक जाम जुइगु जूगुलिं उकियात म्हो यायेत द्रुत बस सेवाया अवधारणा हःगु खः । सुथय् ९ बजे निसें ११ बजे तक व सन्ध्या इलय् ४ बजे निसें ६ बजे तक द्रुत बस सेवा सञ्चालन जुइ ।