माथिल्लो तामाकोशीया मत वैशाखं वइगु

येँ – माथिल्लो तामाकोशी जलविद्युत आयोजनाया ज्या थुगु आर्थिक दँया दुने क्वचाइगु खँ धाःगु दु । ४५६ मेगावाटया आयोजनाया ९६.४ प्रतिशत ज्या क्वचायेधुंकूगु दु । आयोजनाया ३.६ प्रतिशत ज्या जक ल्यं दनिगु खँ धाःगु दु । थौंकन्हय् आयोजनाय् पेनस्टक पाइप तयेगु, सुरुङय् कंक्रिट यायेगु व भेन्टिलेयर सुरुङया ज्या जुयाच्वंगु दु ।

आयोजनाया कथं बाँध दयेकेगु ज्या नं लिपांगु चरणय् थ्यंगु दु । प्रसारण लाइनया प्यंगू टावरया संरचना दयेकेगु ज्या धाःसा ल्यंदनिगु खँ धाःगु दु । आयोजनाया विद्युत गृह दोलखाया ग्रोगर निसें खिम्ति तक ४७ किलोमिटर २२० केभीया प्रसारण लाइन मध्ये २५ किलोमिटर तार सालेगु ज्या पूवनेधुंकूगु खँ आयोजनां धाःगु दु ।

आयोजनाया कथं वइगु वैशाख महिनां निसें मत उत्पादन जुइ । आयोजनां दँय् २ अर्ब २८ करोड युनिट मत उत्पादन जुइगु खँ धाःगु दु । आयोजना दयेकेगु झ्वलय् तःभुखाय्, नाकाबन्दी व सुरुङया डिजाइन हिलेमाःगुलिं यानाः आयोजनाया लागत अप्वःगुलिं थप त्यासा कायेमाःगु अवस्था वःगु खँ धाःगु दु । आयोजना दयेकेत न्हापा ब्याज बाहेक ३५ अर्ब २९ करोड तका तुइगु अनुमान यानातःगु खःसा आः उकिया लागत थहां वनाः ब्याज बाहेक ४९ अर्ब २९ करोड तका थ्यंगु दु । आयोजनाया लागत अप्वयेवं ब्याज खर्च जक १७ अर्ब तका तुइगु अनुमान याःगु दु । आयोजनां दँय् १० अर्बया मत मीगु आज्जु तयातःगु दु ।