पत्रकार महासंघया संस्थापक नायः श्रेष्ठया न्हापांखुसी संस्थागत जन्मजयन्ती

यल- देय्न्यंकंया पत्रकारतय् राष्ट्रिय संगठन नेपाल पत्रकार महासंघया संस्थापक नायः सत्यनारायणबहादुर श्रेष्ठया जन्मजयन्ती न्हापांखुसी संस्थागत रुपय् हनेज्या जुल । नेवाः पत्रकार राष्ट्रिय दबू केन्द्रया ग्वसालय् व दबूया यल जिल्ला कचाया समन्वयय् पत्रकार महासंघया न्हापांम्ह नायः श्रेष्ठया जन्मजयन्ती न्हापांखुसी संस्थागत रुपय् हनेगु ज्या जूगु खः । महासंघया संस्थापक नायः श्रेष्ठया १०४ क्वःगु बुन्हिया लसताय् लाकाः उगु ज्याझ्वः जूगु खः ।

थनया आदर्श विद्या मन्दिर (एभीएम) स्कुलया प्रांगणय् च्वंगु वय्कःया झ्वाताय् स्वां देछासे न्ह्याःगु ज्याझ्वः दबूया केन्द्रीय नायः सुरजवीर वज्राचार्यया सभापतित्वय् जूगु खः । ज्याझ्वलय् नवासें नेपाल आदिवासी जनजाति पत्रकार महासंघ (फोनिज)या अध्यक्ष दण्ड गुरुङं सत्यनारायण बहादुर श्रेष्ठया नामं प्रतिष्ठान चायेकाः न्ह्याः वनेमाःगु खँय् बः बियादिल । अध्यक्ष गुरुङं पत्रकार महासंघं वय्कःया नामं प्रतिष्ठान चायेकेगु खँय् ध्यान बीगु खनेमदु धासें महासंघया संस्थापक नायः सत्यनारायणबहादुर श्रेष्ठ हे खः धयागु मुद्दायात स्थापित याना वनेगु खःसा वय्कःया नामं प्रतिष्ठान चायेकाः ज्या याना वनेमाः धयादिल ।
लिसें वय्कलं प्रतिष्ठान चायेकेत आदिवासी जनजाति पत्रकार महासंघ तयार दु धासें यदि नेवाः पत्रकार राष्ट्रिय दबुलिं हे थ्व कुतः न्ह्याकल धाःसा उकिया निंतिं महासंघ ग्वाहालि व सहकार्य यायेत नं तयार दु धयादिल ।

ज्याझ्वलय् दबूया केन्द्रीय नायः वज्राचार्य, मधेशी पत्रकार संघया नायः मोहन सिंह, एभीएम स्कुलया प्रिन्सिपल नापं सत्यनारायणबहादुर श्रेष्ठया म्ह्याय् सुजिता मानन्धर, दबूया न्वकु नृपेन्द्रलाल श्रेष्ठ, यल कचाया नायः विकास माली लगायतं नुगःखँ तयादीगु खः ।