ने. सं. ११४४ ञलाथ्व दशमी -

बालश्रम प्रयोग जूगु सामग्री बहिष्कारया घोषणा

ख्वप – थनया निगू नगरपालिकां बालश्रम प्रयोग यानातःगु सामग्री बहिष्कार यायेगु घोषणा याःगु दु । ख्वपया सूर्यविनायक नगरपालिका व चाँगुनारायण नगरपालिकां बालश्रम प्रयोग यानाः दयेकातःगु सामग्री बहिष्कार यायेगु घोषणा याःगु खः ।
सूर्यविनायक नगरपालिकाया प्रमुख वासुदेव थापा व चाँगुनारायण नगरपालिकाया प्रमुख सोमप्रसाद मिश्रं मंकाःकथं उकिया घोषणा यानादीगु खः ।

छुं दिं न्ह्यः निगुलिं नगरपालिकां कमलविनायकय् मंकाःकथं ग्वसाः ग्वःगु बालश्रम मुक्त इँटा भट्टा घोषणा ज्याझ्वलय् उकथंया घोषणा यानादीगु खः । बालश्रम प्रयोग यानाः उत्पादन यानातःगु अपा लगायत मेगु छुं कथंया नं निर्माण सामग्रीनापं थःपिनिगु ज्याकू व नगर क्षेत्रया निंतिं आवश्यक जुइगु मेमेगु सामग्रीइतकं बालश्रम प्रयोग यानाः उत्पादन यानातःगु लुत धाःसा उकियात बहिष्कार यायेगु घोषणा वय्कःपिंसं यानादीगु खः ।

निगुलिं नगरपालिकाया प्रमुखं अगलय् जक मखसे मेमेगु थासय् नं बालश्रम प्रयोग मयायेत इनाप यासें नगरपालिकां छपाई लगायत थीथी फाराम, कम्पनी आदि थासय् नं बालश्रम प्रयोग मयायेत इनाप यानादिल । लिसें वय्कःपिंसं बालश्रम प्रयोग यानाः उत्पादन यानातःगु सामग्री बहिष्कार यायेत नं आम सर्वसाधारणयात सार्वजनिक रुपं इनाप यानादिल । उगु इलय् बालश्रम मुक्त दक्षिण वाराही इँटा उद्योग, सरस्वति माता चिम्नी उद्योग व महामञ्जुश्री इँटा उद्योगयात सम्मान नं याःगु खः ।