सगरमाथा गःम्ह पत्रकार रोजिता बुद्धाचार्ययात हन

येँ –  नेपालभाषा न्हिपौंया प्रकाशक व सम्पादन पत्तेबहादुर सिंहया नामय् पत्रकारिता पुरस्कार शुरुवात यायेगु खँ धाःगु दु ।
नेवाः राष्ट्रिय पत्रकार दबू येँ जिल्लाया साधारणसभा म्हिगः जूगु ज्याझ्वलय् न्ववायेगु झ्वलय् उपाध्यक्ष विराजकाजी राजोपाध्याय उगु खँ धयादीगु खः ।

प्रेस काउन्सिल नेपालया कार्यवाहक अध्यक्ष किशोर श्रेष्ठं मूपाहां कथं झाःगु उगु ज्याझ्वलय् सगरमाथा आरोहण यानादीम्ह नेवाः पत्रकार मय्जु रोजिता बुद्धाचार्ययात सम्मान नं याःगु खः । सम्मान ज्याझ्वलय् दबू येँ जिल्लाया अध्यक्ष नातिकाजी महर्जनं दोसल्ला न्यायेकादीगु खःसा मूपाहां श्रेष्ठ सम्मान पौं लःल्हानादीगु खः ।

ज्याझ्वलय् न्ववायेगु झ्वलय् मूपाहां श्रेष्ठं भदौं १ गते निसें लागू जूगु आचार संहितां स्वच्छ पत्रकारिता याइपिंत सुनां नं पने मफइगु खँ कनादिल । वय्कलं पत्रकारिताया नामय् धन्दा याइपिंनिगु निंतिं आचार संहिता आवश्यक जूगु धासें पत्रकारिताया धर्म दुने च्वनाः कलम चले याइपिंत पनेत स्वल धाःसा उकिया विरुद्ध प्रेस काउन्सिल नेपाल न्ह्यःने दंवेगु खँ कनादिल ।

अथेहे ज्याझ्वलय् गोरखापत्र न्हिंपौंया निमित्त प्रधान सम्पादक श्री ओम ‘रोदनं’ पत्रकारत संगठित जुयाः पत्रकारिता ख्यःया वृहत विकासय् न्ह्याःवनेमाःगु खँ कनादिल । ज्याझ्वलय् दबूय केन्द्रीय अध्यक्ष श्रीकृष्ण महर्जन नं न्ववानादीगु खः ।

सम्बन्धित बुखँ

LEAVE YOUR COMMENTS