रेवन्तलालया म्युजिक भिडियो सार्वजनिक

येँ- नेपालभाषाया लोकंह्वाःगु टिभी ज्याझ्वः समयबजिया लोकंह्वाःम्ह कलाकार रेवन्तलाल श्रेष्ठ आः छम्ह म्येहालामि कथं नं पिलू वःगु दु । कलाकार श्रेष्ठं हालादीगु ‘ह्याउँ ख्वाः मिसा’ म्येँया म्युजिक भिडियो आइतबार छगू ज्याझ्वःया दथुइ पितब्वज्या याःगु दु ।

लोकंह्वाःम्ह म्येँ हालामि जुजुकाजी रजितया मूपाहाँ कथं झायादीगु ज्याझ्वलय् नेपालभाषाया न्हापांम्ह म्युजिक भिडियो निर्देशक विजयरत्न असंबरें म्यूजिक भिडियोया समिक्षा यासें ‘म्येँ ख्यालि–न्हिलां जाःगु व रेवन्तलाल श्रेष्ठया अभिनय व सुरेन्द्र मानन्धर या निर्देशनं म्येयात छाय्पियातःगुयात च्वछायेबह जू’ धयादिल ।

ज्याझ्वलय् उगु म्येया परिकल्पनाकार व निर्देशक सुरेन्द्र मानन्धरं लसकुस न्वचु तयेगु झ्वलय् सकसिया कुतलय् छपु बांलाःगु म्येँ पिहां वःगु खँ धयादिलसा नेवाः पत्रकार राष्ट्रिय दबूया नायः सुरजबीर बज्राचार्यं भिंतुना देछायादीगु खः ।

पितब्वज्या जूगु म्यँेया च्वमि व लय चिनामि विष्णु जल्मी , बाजं ग्वसाः जिवित जल्मी, किपालु आयुष महर्जन, सम्पादन इन्द्र मानन्धरं यानादीगु खः । म्येहालामि रेवन्त लाल श्रेष्ठं हे मू भूमिका म्हितातःगु थ्व म्येँय् रबिता बके श्रेष्ठ, सना शाक्य, सुरेश मानन्धर, दिब्यरत्न बज्राचार्य, लक्ष्मीनाथ मदगलिया व सुरेन्द्र मानन्धरपिनि अभिनय दु ।