साफ च्याम्पियनसिप नेपालय् यायेगु प्रस्ताव
येँ – नेपाःयात १३ औं साफ च्याम्पियनसिप ग्वसाः ग्वयेगु औपचारिक प्रस्ताव वःगु दु । दक्षिण एसियाली फुटबल महासंघं (सापंm) थ्व हे वइगु अक्टोबरय् १३ औं साफ च्याम्पियनसिप यायेत औपचारिक पत्र छ्वयाहःगु खः । शुक्रवाः च्वंगु अनलाइन बैठकय् साफ अक्टोबरय् यायेगु सहमति जूगु खःसा गन यायेगु धयागु धाःसा निर्णय मजूगु खः ।
आइतवाः साफया महासचिव अनवरुल हकं एन्फाया महासचिव इन्दूमान तुलाधरयात साफ धेंधेंबल्लाः नेपालय् यायेत प्रस्ताव तयाः पत्र छ्वयाहःगु खः । एन्फाया महासचिव तुलाधरं आः नेपालं विस्तृत प्रस्ताव तयार यानाः अनुमोदनया निंतिं साफय् छ्वयेगु धाःगु दु । महासचिव तुलाधरं साफं प्रस्तावया अध्ययन यानाः साफ आयोजनाया अन्तिम निर्णय साफया कार्यसमितिं याइ धाःगु दु ।
साफ च्याम्पिनसिप थुगुसी बंगलादेशय् यायेगु ज्याझ्वः दुगु खःसा बंगलादेशं कोरोनाया कारणं थःपिंथाय् साफ आयोजना यायेमफइगु धाःगु खः । थ्व हे कारणं नेपाःलिसें भारत, श्रीलंका व माल्दिभ्सं आयोजना यायेत प्रस्ताव तःगु खः । साफय् थुगुसी न्यागू टिमं जक ब्वति काइ । पाकिस्तानयात फिफां प्रतिबन्ध तयातःगु दुसा भुटानं कोरोनाया कारणं नागरिकतय्त देसं पिहां वनेत अनुमति बियातःगु मदु ।
साफय् आः नेपाःलिसें भारत, श्रीलंका बंगलादेश व माल्दिभ्सं जक ब्वति काइ । नेपालं सन् १९९७ व २०१३य् यानाः निक्वः साफया ग्वसाः ग्वयेधुंकूगु दु । नेपाः आःतक साफया फाइनलय् थ्यंगु मदुनि ।
LEAVE YOUR COMMENTS