लिभरपुलया विजय यात्रा जारी

एजेन्सी – इंग्लिश प्रिमियर लिग फुटबलय् लिभरपुलं लगातार स्वंगूगु विजय प्राप्त याःगु दु। साविकया विजेता लिभरपुलं न्हूगु सिजनय् लगातार स्वंगूगु विजय प्राप्त यायेगु झ्वलय् आर्सनलयात ३-१ या गोल अन्तरं बुकूगु खः ।

थुकिया लिसें लिभरपुलं जारी सिजनय् नं शतप्रतिशत विजयया लिच्वःयात कायम हे यायेत सफल जूगु दु। खतुं आर्सनलं नं थम्हं म्हितूगु थ्व स्वयां न्ह्यःया निगू कासाय् विजय प्राप्त याःगु खः । लिगया शुरुवाती निगू कासाय् विजय प्राप्त याःगु आर्सनल साविकया विजेता लिभरपुलया न्ह्यःने पुलिं चुइत बाध्य जुल ।

जारी सिजनय् शतप्रतिशत लिच्वः पिकाये सफल जूसां लिभरपुल अंक तालिकाय् धाःसा निगूगु थासय् लानाच्वंगु दु। लिभरपुलया ९ अंक दुसा समान ९ अंक कयातःगु लेस्टर सिटी गोल भिन्नताया आधारय् शीर्ष स्थानय् लानाच्वंगु दु। स्वंगूगु थासय् लानाच्वंगु एभर्टनया नं समान ९ अंक हे दु ।

सोमवाः चान्हय् जूगु कासाय् आर्सनलं न्हापांगु हाफया २५ औं मिनेटय् अलेक्जेन्डर लाकाजेट्टेया गोलं अग्रता काःगु खः। तर थ्व अग्रता ताःई ल्यना च्वने मफुत । २८ औं मिनेटय् सादियो मानें गोल यानाः कासायात बराबरीइ हःगु खःसा वयां खुगू मिनेट लिपा एन्ड्रयु रोबर्टसनया गोलं लिभरपुलं अग्रता काःगु खः।

न्हापांगु हाफतक छगू गोलं न्ह्यःने लानाच्वंगु लिभरपुलया निंतिं कासाया ८८ औ मिनेटय् थुगु सिजनय् जक क्लबय् वःम्ह डिएगो जोटां गोल यासें विजय सुनिश्चित याःगु खः ।