कन्हय् थिमिइ ‘वः फेस्टिभल’
थिमि(नेपालभाषा टाइम्स)÷ नेवाःतय्सं दछियंकं हनीगु थीथी नखःमध्ये दकलय् लिपांगु सिथि नखःया इलय् विशेष परिकार दयेकाः नइगु वःयात प्रवद्र्धन व थुकिया बारे न्हू पुस्तायात जानकारी बीगु ल्याखः ‘वः फेस्टिभल’ जुइत्यंगु दु । मध्यपुर थिमि नगरपालिकाया ग्वसालय् मध्यपुर पर्यटन विकास समितिया सहकार्यय् कन्हय् शनिवाः मध्यपुर थिमि नगरपालिका ४ वडास्थित निगू पुखुलिइ वः फेस्टिभल जुइत्यंगु खः ।
नेवाः समाजय् थीथी नखःचखःया इलय् थीथी परिकार दयेकाः नयेगु चलन दु । उकीमध्ये सिथि नखःया इलय् नइगु विशेष नसाज्वलं वः खः । नेवाः समाजय् जन्मनिसें मृत्यु संस्कारया इलय् याइगु श्राद्धय् नं वःया विशेष थाय् दु । सामान्यत माय्वः, मूवः, कसूवः, ला वः (लापी)या बारे न्यनातःगु जक मखसे नयेगु नं याना वयाच्वंगु दुसा थ्व बाहेकं गुलिखे वः पुजाआजाय् द्यःयात छाय्त व संस्कारय् जक छ्यलेगु याना वयाच्वंगु दु धइगु यक्वसिनं मसिउ जुइमा ।
गुलिं वः द्यःयात जक छायेगु, गुलिं नयेत जक दयेकीगु व गुलिं वः नयेत व पुजाय् नं छ्यलेगु चलन दुुगु तर थुकिया बारे थौंकन्हय् यक्वसिनं मसिया वंगुलिं उकिया बारे जानकारी बीगु ल्याखं थुगु वः फेस्टिभल यायेत्यनागु समितिया दुजःलिसें फेस्टिभलया कजि कविदास श्रेष्ठं ‘नेपालभाषा टाइम्स’यात कनादिल ।
वय्कलं कनादीकथं थौंकन्हय् बजारय् न्याये दुगु व झीसं छेँय् दयेकाः नयेगु बाहेकं भुवः (तपाःवः), सूवः, ख्वल्चा वः, तरकारि वः म्हुकंचा वः, फसि वः, लैं वः भुति वः बारे यक्वसिनं मसिया वनेधुंकूगु व फेस्टिभलय् थुपिं वःया बारे नं जानकारी बीगु जूगु दु । अप्वःथें वः चिकनय् छुनाः दयेकीगु खःसा ख्वल्चा वः मनाः दयेकीगुलिं फेस्टिभलय् थ्व नं विशेषता जुइगु वय्कलं कनादिल ।
संयोजक श्रेष्ठं फेस्टिभलया निंतिं धकाः हे आतक याना स्वःगु अध्ययनकथं आतक झिता स्वयां अप्वः वःया ताजि व झिंप्यता स्वयां अप्वः नसा ज्वलंपाखें वः दयेके जिउगु खँ सी दुगु दु ।
ज्याझ्वलय् वः बारे दुग्यंक अध्ययन यानादीम्ह रुक्मणि श्रेष्ठं थःगु प्रस्तुतिकरण बीगु ज्याझ्वः नं तयातःगु दु । अथे हे फेस्टिभलय् थीथी वःया परिकारलिसें मेमेगु नेवाः नसाज्वलं नं दइगु वय्कलं कनादिल ।
LEAVE YOUR COMMENTS