संस्कृतीसम्बन्धी नीति दयेकेत कार्यदल
यँ (नेपालभाषा टाइम्स)÷ सरकारं संस्कृतिसम्बन्धी नीति दयेकीगु जूगु दु । नेपालय् न्हापांखुसी दयेकेत्यंगु संस्कृतिसम्बन्धी नीति दयेकेत नेपाल प्रज्ञा प्रतिष्ठानया कुलपति भूपाल राईया संयोजकत्वय् झिंस्वम्ह दुजः दुगु कार्य दल दयेकूगु दु ।
कार्यदलय् नेवाः न्ह्यलुवाः मल्ल के सुन्दर लिसें भाषा आयोगया दुजः अमर गिरी, संस्कृति महाशाखाया प्रमुख दामोदर गौतम, संस्कृतिविद् डा. प्रेम खत्री, संस्कृतिविद् डा. दिल्ली ओली, पुलांम्ह सचिव डा. मानबहादुर विश्वकर्मा, प्रा.डा. वीणा पौड्याल, देवशरण यादव, भोगिराज ताम्लिङ्ग, नवीन सुब्बा व सदस्य सचिवय् संस्कृति शाखाया प्रमुख उ पसचिव पुण्यमाया गुरागाइँ दुथ्याः । समितियात निलाया दुने प्रतिवेदन लःल्हायेत धयातःगु दु ।
संस्कृति, पर्यटन तथा उड्डयन मन्त्री सुदन किराँतीया मन्त्रिस्तरीय निर्णय कथं थ्व समिति दयेकूगु खः । मन्त्री किराँती सोमवाः संसद्या अन्तर्राष्ट्रिय सम्बन्ध व पर्यटन समितिया बैठकय् न्ववासें संस्कृति नीति दयेकेत कार्यदल दयेकेगु खँ धयादीगु खः ।
कार्यदलया संयोजक कुलपति राई कार्यदलयात औपचारिक जिम्मेवारी वयेवं सल्हा सुझाव कयाः वृहत अध्ययन सुरु जुइगु खँ धयादीगु दु ।
LEAVE YOUR COMMENTS