भारतय् छगू अस्पतालय् मि च्यानाः झिम्ह ह्याउँमस्त सित

एजेन्सी – भारतया महाराष्ट्र राज्यय् लाःगु भन्डारा जिल्लाया जिल्ला अस्पतालय् मि च्यानाः झिम्ह ह्याउँमस्त सीगु दु। शनिवाः सुथय् २ बजे पाखें नकतिनि बूपिं ह्याउँमस्त तइगु वार्डय् मि च्याःगु खः । सीपिं मध्ये अप्वः थें क्वथाय् कुँ जायाः अक्सिजन मगाःगुलिं सीगु खँ धाःगु दु। झिम्ह मध्ये स्वम्ह धाःसा मिइ च्याःगु खः । थ्व हे वार्डय् तयातःपिं मेपिं न्हय् म्ह मस्तय्त धाःसा सुरक्षित पिकायेफुगु खँ धाःगु दु ।

मि नःगु अस्पताल लाःगु भन्डारा जिल्ला महाराष्ट्रया राजधानी मुम्बइ स्वयां ९०० किलोमिटर तापाक लाःगु थाय् खः । मुम्बइ मिरर पत्रिकाया कथं स्टाफतय्सं क्वथा चायेका स्वःबलय् दुने कुँ हे कुं जायाच्वंगु खः । थ्व लिपा तुरुन्त अस्पतालया वरिष्ठ अधिकारीतय्त खबर यानाः दमकल सःतूगु खः ।

अस्पतालया छम्ह चिकित्सक प्रमोद खांडेतं स्वम्ह प्यम्ह मस्त च्याःगु व मेपिं फुक्कं अक्सिजन मगाना सीगु खँ कनादीगु दु। थुपिं मस्त अप्वः थें थ्व हे अस्पतालय् बुइकूपिं खःसा छुं मस्तय् पिनें नं उपचारया निंतिं हयातःपिं खः । टाइम्स अफ इन्डियाया कथं सर्ट सर्किट जुयाः मि च्याःगु खनेदु। थ्व घटना जूबलय् छम्ह चिकित्सक व छम्ह नर्स जक उगु वार्डया ड्युटीइ दुगु खः । भारतया केन्द्रीय गृहमन्त्री अमित शाहं ट्विट यासें घटनायात कयाः दुःख प्वंकूगु दु ।