येँ मनपां प्रदर्शनीस्थल निर्माण याइगु

काठमाडौँ, १५ चैत – येँ महानगरपालिकाया प्रमुख विद्यासुन्दर शाक्यं अन्तर्राष्ट्रियस्तरया प्रदर्शनीस्थल निर्माण यायेगु खँ धयादीगु दु । येँ महानगर लागा दुने छगू नं अन्तर्राष्ट्रियस्तरया प्रदर्शनीस्थल मदुगुलिं आः येँ मनपां उकथंया छगू अन्तर्राष्ट्रिय प्रदर्शनीस्थल निर्माण यायेगु प्रमुख शाक्यं धयादीगु खः । वंगु शुक्रवाःनिसें स्वन्हुयंकं जूगु मिसा उद्यमी हस्तकला व्यापार मेलाया उलेज्या यानादिसें येँ मनपा प्रमुख शाक्यं उगु खँ धयादीगु खः ।

लिपांगु इलय् उत्पादन जूगु वस्तुत अप्वया वनाच्वंगु तर उत्पादन यानाः जक मजिउ धासें अज्याःगु सामग्रीया निंतिं बजाःया नं आवश्यक जूगु वय्कलं धयादिल । प्रमुख शाक्यं थ्व हे थासय् उकथंया प्रदर्शनीस्थल निर्माण यायेगु धयामदीसां नं प्रदर्शनीस्थलया आवश्यक दुगु खँय् बः बियादिल । ज्याझ्वलय् उपप्रमुख हरिप्रभा खड्गी श्रेष्ठ) महानगरपालिकां मिसातय् सशक्तिकरणया निंतिं थीथी ब्वय् ब्वथलाः मखसे एकीकृत रुपं हे ज्याझ्वः न्ह्याकाच्वंगु दु धयादिल ।

महानगरपालिका दुनेया सीपमूलक तालिम कयातःपिं मिसातय्सं उत्पादन याःगु वस्तुया उचित रुपं बजाः व्यवस्थापन याये फत धाःसा उकिं मिसातय् आय अप्वया वनी धयादिल । ‘थ ःगनं पिहां वनेमालीगु इलय् थः भाःत वा मेपिं छेँजःपिं सुयाके नं ध्यबा फ्वने म्वाःला धाःसा उकिं तःधंगु हे हिउपाः हये फइ’ उपप्रमुख खड्गीं धयादिल । सछितकानिसें न्यय्गू लाख तका तक वंगु सामग्री तयातःगु स्वन्हुयंकं जूगु व्यापार मेलाय् म्हिगः क्वचाःगु खः । मेला मिसा दिवसया लसताय् लाकाः जूगु खः ।