धार्मिक अतिवाद ब्वलंकेत्यंगु संकेत, क्रिश्चियन धर्म प्रचारकयात हाखः पाकल

येँ (नेपालभाषा टाइम्स)÷छुं ई न्ह्यः तिनि सा स्यानाः ला नःगु धइगु द्वपनय् छुं आदिवासी जनजाति नागरिकयात कारवाही याःगु घटनाया नापनापं आः क्रिश्चियन धर्म प्रचार याना जूपिं धइगु द्वपनय् हानं निम्ह मनूयात ज्वनाः ख्वालय् हाखः पाकेगु ज्या जूगु दु । थुकिं यानाः समाजय् धार्मिक अतिवाद ब्वलनेत्यंगु जकं मखु ला धइगु ग्याःचिकु नं ब्वलंगु दु ।

म्हिगः मंगलवाः जनकपुरय् क्रिश्चियन धर्म प्रचार याः वयाच्वंपिं निम्ह मनूयात ‘हिन्दू सम्राट सेना नेपाल’ नांगु हिन्दूवादी पुचलं ज्वनाः लँय् हे ख्वालय् हाखः पाकूगु खः । अमित राउत नांम्ह मनूया नेतृत्वय् वःगु हिन्दूवादी पुचलं धर्म प्रचार याः वयाच्वंपिं धइगु द्वपनय् छम्ह मिसा व छम्ह मिजंयात ज्वंगु खःसा मिजंम्हेसित ख्वालय् हाखः पाकाः प्रहरीयात लःल्हाःगु खः । उमिसं मिसाम्हेसित नं हाखः पाकेत्यंगु खःसा स्थानीय मनूतय्सं मिसायात अथे याये मजिउ धकाः पना बिउगु खँ नं धाःगु दु ।

धर्म प्रचार याः वःगु धइगु द्वपनय् उमित ज्वनाः दुव्र्यवहार याःगु खःसां उमिसं सुयात धर्म परिवर्तन याःगु खः धइगु खँ धाःसा धाःगु मदुनि । घटनायात कयाः प्रहरीं अनुसन्धान यानाच्वंगु खँ धाःगु दु ।

धरानय् देगःया न्ह्यःने चर्च दयेकल धकाः याःगु विरोधया नापनापं सायागु ला नल धकाः कारवाही याःगुयां लिपा आः धर्म प्रचार यात धकाः क्रिश्चियन धर्मावलम्बीतय्त नं आक्रमण शुरु याना हःगुलिं देशय् धार्मिक अतिवाद ब्वलनेत्यंगु जकं मखु ला धइगु ग्याःचिकु ब्वलंगु दु । हिन्दू धर्मयात संरक्षण यायेमाः धइगु नामय् थौंकन्हय् छुं राजनीतिक पार्टी समेत लगे जुयाच्वंगु दुसा उमिसं हिन्दू धर्म संरक्षण यायेगु लागिं देशय् राजतन्त्र लित हयेमाः धइगु नारा समेत बीगु याना हःगु दु ।

‘भारत’ लाकि ‘इण्डिया’ ?
नेपालय् धार्मिक अतिवादीत सक्रिय जुया वःगुया लिउने भारतय् थौंकन्हय् तच्वया वःगु हिन्दुत्वया नं तःधंगु ल्हाः दुगु खँ धाःगु दु । भारतया हिन्दू अतिवादीतय्सं छुं ई न्ह्यः तिनि बुद्ध जन्मस्थल लुम्बिनीइ तकं जय श्री राम धइगु नारा थ्वयेकाः बाखं कनेगु कार्यक्रम याःगु खः ।

झ्वलय् भारत सरकारं हिन्दुत्वयात महत्व बीगु ल्याखं हानं मेगु ‘काण्ड’ याःगु दु । भारतय् जुइत्यंगु जी–२० या बैठकय् ब्वति काः वइपिं पाहां व मेपिंत राष्ट्रपतिपाखें ब्वंगु छगू ब्यलि भ्वय्या कार्डय् ‘प्रसिडेन्ट अफ भारत’ धकाः च्वःगु खँयात कयाः तीव्र विवाद जूगु दु ।

न्हापा न्हापा ‘प्रेसिडेन्ट अफ इण्डिया’ धकाः च्वयेगु याना वयाच्वंथाय् आः ‘प्रेसिडेन्ट अफ भारत’ च्वःगुलिं भारतीय सरकारं देशया नां हे हिलेत्यंगु खः लाकि धकाः विपक्षी नेतातय्सं विरोध यानाहःगु दु । भारतयात अंग्रेजी भासं तकं ‘इण्डिया’ मधासे ‘भारत’ हे धायेगु यायेत्यंगुया लिउने नं हिन्दुत्वया हे मुद्दा सुलाच्वंगु अनुमान याना हःगु दु ।