पञ्जरांया निंतिं मूल समिति गठन
येँ(नेपालभाषा टाइम्स)- नेवाः बौद्ध धर्मावलम्बितय् तःजिगु पर्व ‘पञ्जरां’ मंकाःकथं न्यायेकेया निंतिं ‘सामूहिक पञ्दान ज्याझ्वः मूल समिति–२०८०’ नीस्वंगु दु । नेपाल परम्परागत बौद्ध धर्म संघ कान्तिपुर शाखाया ग्वसालय् जूगु छगू भेलां पञ्जरां तःजिक हनेया निंतिं मूल समिति नीस्वंगु खः ।
वंगु बुधवाः संघया कान्तिपुर शाखाया नायः राजगुरुजु मञ्जुश्रीरत्न वज्राचार्यया सभापतित्वय् येँ देय्या बहाः बहीया वज्राचार्य शाक्य कुलपुत्रलिसें जयमांपिनिगु मंकाः मुँज्यां दशरत्न वज्राचार्यया संयोजकत्वय् सछिम्ह दुजःदुगु ‘सामूहिक पञ्दान ज्याझ्वः मूल समिति’ नीस्वंगु खः ।
बैठकं पञ्जरां पर्व झःझः धायेक हनेत सकल वज्राचार्य गुरुजु, शाक्यभिक्षु गुरुमांपिंत मंकाःकथं पञ्जरां फःवनेगु ज्याझ्वलय् ब्वति कायेत नं इनाप याःगु दु । लिसें सकल जयमांपिंसं थःथःगु बहाः, बही, चुक, ननि व त्वाःत्वालय् च्वनाःपञ्जरां बीत नं इनापयाःगु दु ।
दँय्दसं गुंलागा त्रयोदशि, जुगःचः¥हेकुन्हु तःजिक न्यायेकीगु पञ्जरां थुगुसी थ्व हे भदौ २६ गते मंगलवाः लानाच्वंगु दु । थ्वकुन्हु सकल वज्राचार्य शाक्य गुरुजु, गुरुमांपिं थँबहिलिइ सुथसिया ८ ताः इलय् मुनाः थीथी बहाः, बही, त्वाःत्वालय् मंकाःकथं पञ्जरां फःवनेगु व सेतो दरवार जमलय् थ्यंकाः क्वचायेकेगु समितिया संयोजक वज्राचार्यं जानकारी बियादीगु दु ।
मूल समितिनी स्वनेत च्वंगु मुँज्याय् नेपाल परम्परागत बौद्ध धर्म संघया केन्द्रीय नायःलिसें बौद्ध विद्वान प्रा. डा. नरेशमान वज्राचार्य, राजगुरुजु मञ्जुश्रीरत्न वज्राचार्य, मूल समितिया संयोजक दशरत्न वज्राचार्य, संघया कान्तिपुर शाखाया सचिव भीमरत्न वज्राचार्य, बागमति प्रदेशसभा सदस्य शैलेन्द्रमान वज्राचार्र्य, लुम्बिनी बौद्ध विश्वविद्यालयया पुलांम्ह उपकुलपति प्रा. डा. हृदयरत्न वज्राचार्य, शाक्यम हाविहार संघया महासचिव संघरत्न शाक्य लगायतं पञ्जरांया महत्व व थुकिया थीथी पक्षयात कयाः नुगःखँ तयादीगु खः ।
लुमंकेबहजू तःदँ न्ह्यःनिसें पञ्जरांपाखें संकलन जूगु ध्यबा लुम्बिनीइ दयेकाच्वंगु नेपाल वज्रयान महाविहार निर्माणय् छ्यलेगु याना वयाच्वंगु दु ।
LEAVE YOUR COMMENTS