त्रिशुली खुसिइ कुतुं वंगु बस लुइके मफुनि

येँ (नेपालभाषा टाइम्स)÷ नारायणगढ–मुग्लिन सतक खण्डया भरतपुर महानगरपालिका–२९ सिमलतालय् चलखं चुइकाः त्रिशुली खुसिइ कुतुं वंगु बस म्हिगः बहनी तकं लुइके मफुनि । सशस्त्र प्रहरी बल, नेपाली सेनाया गोताखोर पुचलं कुतुं वंगु उगु बस मालेगु ज्या याःगु खः ।

त्रिशुली खुसिया तच्वकं खुसिबाः वयाः लः तसकं बुलुसे च्वंगुलिं व बस कुतुं वंगु थाय् तसकं मछिंगु थासय् लाःगुलिं मालेत समस्या जुयाच्वंगु खँ सशस्त्र प्रहरीं धाःगु दु । खुसिं चुइकाः क्वय् थ्यंक यंकूगु अनुमान यासें देवघाटय् नं प्रहरी परिचालन याःगु खःसां नं लुइके मफयाच्वंगु खँ प्रहरीं धाःगु दु ।

प्रहरीं बसयात चलखय् कुतुं वःगु चां ल्हानाच्वंगु आशंका नं याःगु दु । तर म्हिगः तक चलः चीकाः मालेगु अवस्था मदुगु खँ धाःगु दु । दुर्घटनास्थलं थ्यंमथ्यं २०० मिटर क्वय्थ्यंक वनाः गोताखोरया पुचलं मालेगु ज्या याःगु खः । व स्वयां क्वय् तःधंगु भुमरी दुगुलिं मालेगु ज्या समस्या जुयाच्वंगु खँ नं धाःगु दु । बस मालेगु नितिं प्रहरीं चुम्बक नं छ्यःगु खः ।

सिमलतालय् म्हिगः सुथय् ३ बजे वीरगञ्जं येँय् वयाच्वंगु बागमती प्रदेश–०३–००६ ख १५१६ नम्बरया एन्जल डिलक्स बस व येँनं गौरपाखे वनाच्वंगु बागमती प्रदेश–०३–००१ ख २४९५ नम्बरया बस चलखं चुइकूगु खः । थ्वहे झ्वलय् त्रिशुलीइ कुतुंवंगु बस मालेगु ज्या थौं सुथय् तकया नितिं स्थगित याःगु दु । कुतुं वंगु बसय् गुलि मनू दु धइगु खँ सी मदुनि । बस व्यवसायीपाखें बिउगु जानकारी कथं उगु बसय् ४८ म्ह यात्रु दु । बस कुतुं वनेवं प्यम्ह यात्रु धाःसा तिंन्हुयाः बचे जूगु खः ।

थ्वहे झ्वलय् निरन्तर वा वयावंगु कारणं जेठ २८ गते निसें देय् थीथी थासय् यानाः १०३ म्ह सीगु दु । केन्द्रीय प्रहरी समाचार कक्षया कथं खुसिबाः, चलखय् लानाः येँय् छम्ह, १ नम्बर प्रदेशय् १९ म्ह, मधेश प्रदेशय् न्याम्ह, बागमती प्रदेशय् खुम्ह, गण्डकी प्रदेशय् ३८ म्ह, लुम्बिनी प्रदेशय् २३ म्ह, कर्णाली प्रदेशय प्यम्ह व सुदूरपश्चिम प्रदेशय् न्हय्म्ह मनू सीगु जानकारी बिउगु दु ।

उकथं हे येँय् स्वम्ह, १ नम्बर प्रदेशय् ३१ म्ह, मधेश प्रदेशय् च्याम्ह, बागमती प्रदेशय् प्यम्ह, गण्डकी प्रदेशय् २८ म्ह, लुम्बिनी प्रदेशय् गुम्ह, कर्णाली प्रदेशय् झिंन्याम्ह व सुदूरपश्चिम प्रदेशय् झिंछम्ह यानाः १०९ म्ह घाःपाः जुयाच्वंगु दु ।