कर्णाली प्रदेशया मुख्यमन्त्री विरुद्ध अविश्वासया प्रस्ताव

येँ (नेपालभाषा टाइम्स) – कर्णाली प्रदेशया मुख्यमन्त्री महेन्द्रबहादुर शाही विरुद्ध सत्तारुढ नेकपाया हे सांसदतय्सं अविश्वासया प्रस्ताव तःगु दु। कर्णाली प्रदेशया झिंच्याम्ह सांसदतय्सं प्रदेश सभाय् शाही विरुद्ध अविश्वासया प्रस्ताव यंकूगु खः । म्हिगः छगू पत्रकार सम्मेलन यानाः सांसद यामलाल कँडेलया नेतृत्वय् हस्ताक्षर संकलन यानागु खँ धाःगु दु ।

मुख्यमन्त्री शाही पुलांगु माओवादीया नेता खःसा वय्कःविरुद्ध हस्ताक्षर याःपिं मध्ये झिंन्याम्ह पुलांगु एमालेया सांसदत दुसा स्वम्ह पुलांगु माओवादीया सांसदत दु। ४० म्ह सांसद दुगु कर्णाली प्रदेशय् नीम्ह पुलांगु एमालेया, झिंस्वम्ह पुलांगु माओवादीया, खुम्ह नेपाली कांग्रेसया व छम्ह राप्रपाया सांसद दु। पुलांगु एमालेया नेता राजबहादुर शाही आः सभामुख जुयाच्वंगु दु। नेपालय् सुं नं मुख्यमन्त्रीयात अविश्वासया प्रस्ताव तःगु थ्व हे न्हापांखुसी खः ।