लानिपुखू दयेकेत प्यक्वःगु टेन्डरया तयारी

येँ –  ऐतिहासिक लानिपुखूया पुनर्निर्माणया निंतिं येँ महानगरपालिकां प्यक्वःगुखुसी बोलपत्र आह्वान यायेगु तयारी याःगु दु । येँ महानगरपालिकाया प्रवक्ता ईश्वरमान डंगोलया कथं लानिपुखू दयेकेत स्वक्वःखुसी आह्वान याःगु टेन्डरय् स्वंगू पुचलं इच्छा क्यंगु खःसा निगू पुचलं आवश्यक डकुमेन्ट पूरा मयाःगु व छगू पुचःया डकुमेन्ट पूरा जूसां नं कामपा क्वःछिनातःगु स्वयां अप्वः ध्यबा तयाः बोलपत्र तःगुलिं स्वंगूलिं टेन्डर रद्द जूगु खँ कनादीगु दु ।

नेपालभाषा टाइम्सलिसें खँ ल्हासें वय्कलं बोलपत्र दर्ता याःगु छगू कम्पनीं व्यवसायी दर्ता पुला मतःगु, मेगु कम्पनीया डकुमेन्ट मयाःगु छगू कम्पनीं बोलपत्र स्वयां ११ प्रतिशत अप्वः ध्यबा माग यानाः टेन्डर तयातःगुलिं स्वंगुलिं टेन्डर रद्द यायेमाःगु खँ कनादीगु दु । वय्कलं टेन्डर आह्वान याःगु स्वयां अप्वः माग याःगु कम्पनीयात टेन्डर बीत मनपाया अधिकार क्षेत्रं पिने लाःगु धासें आः हाकनं मेगु टेन्डर आह्वान यायेगु तयारी जुयाच्वंगु खँ कनादीगु दु ।

येँ मनपां लानिपुखू १२ करोड ६६ लाख तका क्वःछिनाः बोलपत्र आह्वान याःगु खः । वय्कःया कथं स्वक्वगू खुसीं आह्वान याःगु टेन्डरय् दुहां वःगु आशय पत्र स्वयेबलय् मिलोमतो खनेदुगु धासें आः न्हूगु बोलपत्र थ्वहे वइगु निवाःया दुने यायेगु कथं तयारी जुयाच्वंगु खँ कनादीगु दु ।
वंगु स्वन्तिया इलय् हे लानिपुखू दयेकेगु धकाः धाःसां नं थीथी कारणं यानाः पुखू दयेकेगु ज्या न्ह्याके फयाच्वंगु मदु ।

लानिपुखू दयेकेगु निंतिं पुरातत्व विभाग, पुनर्निर्माण प्राधिकरण व येँ मनपाया दथुइ छगू हे मत जुइ फयाच्वंगु मदु । पुरातत्व विभागं आः दुगु गुम्बज शैलीं हे लानिपुखू पुनर्निर्माण यायेगु खँ धायेगु यानाच्वंसां नं येँ मनपा व पुनर्निर्माण प्राधिकरणं धाःसा प्रताप मल्लकालीन शिखर शैली दयेकेमाःगु अडान कयाच्वंगु दु ।

पुरातत्व विभाग व येँ मनपा दथुइ विवाद जुइवं विवाद समाधान यायेत वंगु पुस १३ गते छगू विज्ञ पुचः निस्वंगु खःसा विज्ञ पुचलं बिउगु सुझाव कथं प्रताप मल्लकालीन शैली दयेकेमाःगु सुझाव बिउगु खः ।

सम्बन्धित बुखँ

LEAVE YOUR COMMENTS