ने. सं. ११४३ तछलागा चौथी -

न्हापा लानाच्वंम्हेसित लँय् पनाबिल

विश्वय् गुलि नं कासा जुइ, उकी मिसा व मिजंया बिस्कं बिस्कं हे धेंधेंबल्लाः जुइ । मिसा व मिजंयात छगू हे पुचलय् दुथ्याकाः जुइगु कासा शायद म्हो जक जू । फुटबल, बास्केटबल, भलिबल, स्वीमिंग, मार्शल आर्ट, एथ्लेटिक्स, ब्वाज्या आदि कासा मिसा व मिजंया बिस्कं बिस्कं धेंधेंबल्लाः जुइगु कासा खः ।

टेबुलटेनिस, ब्याडमिन्टन, टेनिस कासा मिसा व मिजं नापं अर्थात ‘डबल्स’ कासा जुइ । थ्व हे झ्वलय् युरोपेली राष्ट्र बेल्जियमय् हालय् छगू साइक्लिंग कासा जुल । विशेष कथंया साइकल ब्वाकेगु थ्व कासा नं मिसा व मिजंया दथुइ बिस्कं बिस्कं हे जूगु खः । तर थ्व कासाय् छम्ह मिसायात दथुइ हे छुं ईया निंतिं लँ पनाबिल ।

व नं दकलय् न्ह्यःने लानाच्वंम्ह मिसा साइक्लिष्टयात । मिसा व मिजंया दथुइ बिस्कं बिस्कं धेंधेंबल्लाः जूगु कासाय् आखिर उम्ह दकलय् न्ह्यःने लानाच्वंम्ह मिसायात छाय् थुकथं लँय् पनाबिल ले ? न्ह्यसः गुलि रहस्यमय खनेदु, लिसः उलि हे न्ह्यइपुसे च्वं !मिसा व मिजं दथुइ बिस्कंया साइकल ब्वाकेगु कासा खयाः नं उम्ह मिसा कासामिं समग्रय् दक्वं मिजं कासामिात लिफ्यानाः न्हाप लाइगु छाँट खने दयेवं वयात लँय् दथुइ हे छुं ईया निंतिं पना बिउगु खः, व नं ग्वसाः खलकं हे ।

वंगु छुं दिं न्ह्यः बेल्जियमया ओमलुप हेट न्युजब्लाड नांया संस्थां ग्वसाः ग्वःगु साइकल रेसय् ब्वति कयाच्वंम्ह निकोल हेनस्लमन नांया दकलय् न्ह्यःने लानाच्वंम्ह मिसायात लँय् पना बिउगु खः । ३५ किलोमीटर स्वयां अप्वः दूरी पार यायेधुंकूगु अवस्थाय् रेश मार्शलं पना बिल । उगु इलय् निकोल तसकं तीव्र गतिं साइकल ब्वाकाः थः स्वयां न्ह्यःने लानाच्वंपिं मिजं प्रतिपस्धीात लिफ्यायेगु क्रमय् दुगु खः ।

मिसा व मिजंया साइक्लिंग १० मिनेटया फरकय् शुरु जूगु खःसा १० मिनेट लिपा साइकल ब्वाकेगु शुरु याःम्ह निकोलं थः प्रतिस्पर्धीयात गाक्कं लिउने लाकूगु जक मखु, थः स्वयां गाक्कं न्ह्यःने लानाच्वंपिं मिजंतय्त तकं लिफ्यायेगु क्रमय् सतिक थ्यने धुंकूगु खः ।

१२३ किलोमिटरया प्रतिस्पर्धाय् प्यब्वय् छब्व दूरी पार यायेधुंकाः मिजंतय्त तकं लिफ्यायेत वनाच्वंगु इलय् निकोलयात पनाः मिजंत छुं भचा दूरी तापाक वने धुंकाः जक वयात साइक्लिंग यायेत धाःगु खः । थ्व क्रमय् मिजंत तसकं तापाक थ्यंगु जक मखु, मिसा प्रतिस्पर्धीत नं वयागु सतिक थ्यंकः वःगु खः ।

दथुइ हे कासा दिकेमाःगु तनावया कारणं लिपा निकोलं कासा शुरु याःगु गतियात निरन्तरता बी मफयेवं कासाया ७४ औं थासय् चित्त बुझे यायेमाःगु खः । थुगु घटनायात कयाः निकोलं सामाजिक संजालय् व्यंग्य यासें च्वःगु दु कि, ‘शायद जि व जिमि पासापिं तसकं तीव्र गतिइ दुगु खः, वा धाये मिजंत तसकं सुस्त गतिइ दुगु खः ।’