ने. सं. ११४४ ञलाथ्व दशमी -

लुम्बिनीइ ऊ थान्तया झ्वाता

येँ – बुद्ध जन्मस्थल लुम्बिनीइ संयुक्त राष्ट्र संघया पुलांम्ह महासचिव ऊ थान्तया झ्वाता निर्माण याःगु दु । लुम्बिनी विकासया छम्ह न्ह्यलुवाकथं कयातःम्ह थान्तया झ्वाता वय्कःया सम्मानय् लुम्बिनीइ निर्माण याःगु खः ।

जापानी नागरिक टोकुशिन कासाईया आर्थिक ग्वाहालिं लुम्बिनी सूचना केन्द्र परिसरय् निर्माण जूगु थान्तया झ्वाता प्रदेश नं. ५ या उद्योग, पर्यटन, वन तथा वातावरणमन्त्री लीला गिरी, लुम्बिनी विकास कोषया उपाध्यक्ष भिक्षु मैत्रैय, लुम्बिनी बौद्ध विश्वविद्यालयया उपकुलपति प्रा. डा. हृदयरत्न वज्राचार्य, थान्तया छय्लिसें म्यान्माया यांगुन हेरिटेज ट्रष्टया संस्थापक डा. थान्त मिन्ट ऊं मंकाःकथं अनावरण यानादीगु खः ।

उगु इलय् मन्त्री गिरीं थान्तया हे कारणं लुम्बिनीया विकास सम्भव जूगु धासें बुद्धया सन्देश व वसपोलं क्यना बिज्याःगु मार्गदर्शन सकसिगुं निंतिं प्रेरणादायी जूगु धयादिल । लिसें वय्कलं लुम्बिनी भ्रमण वर्षं थुकियात अझ विश्वव्यापी याइगु विश्वास प्वंकादिल ।

लुम्बिनी विकास कोषया उपाध्यक्ष भिक्षु मैत्रैयं थान्तं क्यंगु लँपुइ लुम्बिनी विकास कोष न्ह्याः वनाच्वंगु व लुम्बिनी गुरुयोजना याकनं क्वचायेकेगुपाखे वनाच्वंगु धयाबिज्यात । थान्तया छय् मिन्ट ऊं थः बाज्याः न्ह्याकूगु अभियानयात अझ व्यापक याना यंकेगु प्रतिवद्धता प्वंकुसे लुम्बिनीयात विश्व समुदायया न्ह्यःने प्रचार प्रसार यायेगु निंतिं न्ह्याज्यायेगु जुइ धयादिल ।

बुद्ध जन्मस्थल लुम्बिनीया विकास व प्रचारप्रसारया निंतिं थान्तया भूमिकायात अतिकं महत्वपूर्ण रुपं कायेगु याः । सन् १९६१ निसें १९७१ तक संयुक्त राष्ट्र संघया स्वम्हम्ह महासचिव जुयादीम्ह थान्तं सन् १९६७ लय् लुम्बिनीया भ्रमण यानादीगु खः । वयां लिपा वय्कःया हे पहलय् लुम्बिनीया विकासया निंतिं छगू अन्तर्राष्ट्रियस्तरया समिति तकं गठन याःगु खः ।

गुगु समिति लुम्बिनीया योजनावद्ध विकास व प्रचार प्रसारया निंतिं कोशल्वहं सावित जूगु खः । ऊ थान्तया हे अग्रसरताय् लुम्बिनी विकासया गुरुयोजना दयेकूगु खःसां आतकं उकियात पूवंके फुगु धाःसा मदुनि ।