परियत्तिया विद्यार्थीपिंत उद्घोषण तालिम

ख्वप – मैत्रेय युवा संघया ग्वसालय् लछियंकं जूगु उद्घोषण तालिम क्वचाल । संघया ग्वसालय् परियत्ति शिक्षाया विद्यार्थीतय् निंतिं वंगु जेठ २६ निसें असार २३ गतेतक उगु तालिमया जूगु खः । पंचशील ग्रहण यासें न्ह्याःगु तालिम समापन ज्याझ्वलय् सहभागि सकसितं दसिपौ इनेज्या जूगु खः ।

प्रशिक्षार्थी रञ्जु तामांगं लसकुस यानादीगु ज्याझ्वलय् तालिमय् सहभागि प्रशिक्षार्थीतय्सं थःथःगु अनुभव कंगु खः । मुक्क झिम्ह प्रशिक्षार्थी सहभागित जूगु तालिम समापन ज्याझ्वलय् संघया सल्लाहकार सत्यलक्ष्मी रंजितकारं भविष्यया कर्णधार विद्यार्थीया निंतिं परियत्ति अतिकं आवश्यक जूगु विचाः प्वंकादीगु खःसा लक्ष्मीचन्द्र वज्राचार्यं वक्तृत्वकला नं छगू सीप खः धासें थुकियात सयेका कायेगु नं मंगल ज्या जूगु विचाः तयादीगु खः ।

अथे हे मैत्रेय परियत्ति केन्द्रया केन्द्राध्यक्ष तीर्थराज वज्राचार्यं परियत्ति शिक्षायात श्रद्धां जक न्ह्याकाच्वनेगु मखसे थुकिया निरन्तरताया नितिं विद्यार्थीतय्त नैतिक, शिष्टाचार व अनुशासन नं ब्वलंकेमाः धासें उकिया निंतिं सरकारी मान्यता नं प्राप्त यायेमाःगु खँय् बः बियादिल ।

लिसें वय्कलं सरकारी मान्यता प्राप्त यायेगु खँय् सरकारी अधिकारीपिं पहल याःसां नं परियत्ति केन्द्रं हे गाक्कं पहल याये मफुगु खँय् चिउताः प्वंकादिल ।

समापन ज्याझ्वलय् मूपाहांकथं बिज्याःम्ह भिक्षु अर्जुनं तालिमय् सहभागि प्रशिक्षार्थीपिंत दसिपौ लःल्हाना बिज्यासें थुगुसीया एसइइ परीक्षाय् उत्कृष्ट ल्याः हयेत ताःलाःम्ह परियत्ति ब्वनामि सरिना अवाले व अमिता दोंगयात बौद्ध चैत्य लःल्हाना बिज्याःगु खः । ज्याझ्वः संघया अध्यक्ष संचित बुद्धाचार्यया सभापतित्वय् जूगु खःसा अमिताभ दोंगं सुभाय् देछानादीगु खः ।