सत्यनारायणबहादुर श्रेष्ठ प्रेस स्वतन्त्रता सेनानी सिरपाः बीगु

येँ (नेपालभाषा टाइम्स)- नेपाल पत्रकार महासंघया संस्थापक अध्यक्ष सत्यनारायणबहादुर श्रेष्ठया नामं ‘सत्यनारायण बहादुर श्रेष्ठ प्रेस स्वतन्त्रता सेनानी’ सिरपाः बीगु जूगु दु । थुगुसी नीस्वंगु थ्व सिरपाः गोरखापत्र न्हिपौया वरिष्ठ पत्रकार लक्की चौधरीयात लःल्हाइगु जूगु दु । शुक्रवाः श्रेष्ठया १०८ दँ बुन्हिया लसताय् जुइगु ज्याझ्वःया दथुइ थुगु सिरपाः लःल्हाइगु जूगु दु ।

नेवाः पत्रकार राष्ट्रिय दबूपाखें लःल्हाइगु थुगु सिरपाःया दाता सुचिता मानन्धर खः । सिरपाः २५,०००।– तका व दसिपौ सहितया खः ।

शुक्रवाः जुइगु ज्याझ्वलय् श्रेष्ठया १०८ दँ बुन्हिया लसताय् जूगु ‘सत्यनारायण बहादुर स्मृति मिडिया कपय् विजयीपिंत नं कप व मेडल लःल्हाइगु जूगु दु । वंगु सोमवाः जूगु थुगु फुटसलय् पत्रकार दबू चितवन शाखा न्हाप, येँ शाखा ल्यू व नेवाः कलाकार पुचः लियांल्यू लाःगु खः ।

नेवाः पत्रकार राष्ट्रिय दबुलिं सत्यनारायण बहादुर श्रेष्ठयात पत्रकार महासंघया संस्थापक अध्यक्ष कथं म्हसिका बीगु ताः तयाः थीथी ज्याझ्वः याना वयाच्वंगु दु । थौंकन्हय् नेपाल पत्रकार महासंघया संस्थापक अध्यक्ष कांग्रेस नेता कृष्णप्रसाद भट्टराईयात नाला वयाच्वंगु दु । तर वि.सं. २००८ सालय् श्रेष्ठं न्हापांखुसी पत्रकार संघ स्थापना यानाः अध्यक्ष जुयादीगु खः ।