नेवाः अभियन्तात छथाय् , आः वइगु चुनाव नापं जानाः ल्वायेगु बारे तकं सहलह
येँ (नेपालभाषा टाइम्स)- नेवाः कला, सम्पदा व संस्कृति संरक्षणया उद्देश्य तयाः सक्रिय जुयाच्वंपिं नेवाः अभियन्तात छथाय् च्वनाः ज्या यायेगु लागिं पहल शुरु जूगु दु । थुकिया लागिं औपचारिक व अनौपचारिक रुपं नं खँल्हाबल्हा जुयाच्वंगु खँ उकी संलग्न अभियन्तातय्सं धाःगु दु ।
छुं ई न्ह्यः तिनि थीथी अभियन्तात छथाय् च्वनाः छधी जुयाः न्ह्याः वनेगु विषयय् सहलह याःगु खः । वय्कःपिंसं थःपिनि सहलहया किपा नापं सामाजिक सञ्जालय् सार्वजनिक यानादीगु खः ।
उगु मुँज्याय् थीथी नेवाः मुद्दायात ल्ह्वनाः सक्रिय जुयाच्वंपिं शैलेश शाक्य बरेजु, सुमन साय्मि, याद्धवलाल कायष्ठ आदिपिनि उपस्थिति दुगु खः ।
मुँज्याय् दुथ्याःम्ह नेवाः अभियन्ता शैलेश शाक्यं कनादीकथं वय्कःपिनि दथुइ थौंकन्हय् नेवाःतय्त वयाच्वंगु थीथी समस्यायात कयाः सहलह जूगु खः । खास यानाः येँ महानगरपालिकाय् बालन साह मेयरया रुपय् त्याना वयेधुंकाः यानाच्वंगु थीथी ज्याखँयात कयाः नं चर्चा जूगु खः ।
मेयर साहं यानाच्वंगु गुलिखे ज्याखँयात येँया जनतां ययेकाच्वंगु दुसा गुलिख ज्याखँयात आलोचना नं यानाच्वंगु दु । खास यानाः बँपसः चीकेगु, सुकुम्बासी वस्ती चीकेगु थेंज्याःगु ज्याखँयात समर्थन यानाच्वंगु दुसा सर्वसाधारण जनताया छेँ थुनेगु, त्वाःछेँ थुनेगु, स्थानीय मनूतय् निजी जग्गाय् डोजर चले यायेगु थेंज्याःगु ज्याखँयात आलोचना यानाच्वंगु दु ।
अभियन्ता शाक्यं कनादीकथं वय्कःपिनि दथुइ आः येँय् जुइगु थीथी चुनावय् कार्यगत एकता यानाः ब्वति कायेगु बारे नं सहलह जूगु खः । खास यानाः आः विसं २०८५ सालय् जुइगु संसदीय चुनावय् सकलें मिले जुयाः थीथी थासय् उम्मेदवारी बिया वनेगु धकाः नं खँ ब्याकूगु खः । वंगु चुनावय् थीथी क्षेत्रय् नेवाः अभियन्तातय्सं उम्मेदवारी बिउगु खःसां थःथः ल्याखं चुनावय् दंगु जुयाः सुनानं त्याके मफुगु विषयय् नं मुँज्याय् बिचाः ब्याकेगु ज्या जूगु खः ।
लुमंकेबहः जू, वंगु चुनावय् नेवाः मुद्दायात ल्ह्वना वयाच्वंपिं अभियन्तात याद्धवलाल कायस्थ, सुमन साय्मि, शैलेश शाक्य, राजाराम तण्डुकार, रबिन्द्रकुमार श्रेष्ठ, सुदय शिलाकार आदिपिंसं स्वतन्त्र कथं उम्मेदवारी बिउगु खःसा वय्कःपिं सुं हे निर्वाचित जुया मदी ।
नेवाःतय्गु सम्पदा, संस्कृति, सामाजिक ज्याखँ आदि थीथी ख्यलय् नेवाः अभियन्तात सक्रिय जुयाच्वंसां इलय् ब्यलय् वय्कःपिंसं थवंथवय् हे ध्याचू न्यंकाः सामाजिक सञ्जालय् च्वयेगु व मेपिंसं उकिया लिसः बियाः मनमुताव अप्वयेकेगु ज्या यानाच्वंगु नं खनेदु । थुकिं यानाः वय्कःपिनि शक्ति राज्यसत्ता विरुद्ध प्रयोग जुइमाःथाय् अःखतं थवंथःत हे कमजोर यायेगु ज्याय् खर्च जुयाच्वन धकाः नं वरिष्ठपिं अभियन्तातय्सं धायेगु याः । नेवाःतय्सं तःजिक याःगु गुथि आन्दोलन वय्कःपिं अभियन्तातय्गु मंकाः कुतलं हे सफल जूगु लुमंकेबहः जू ।
LEAVE YOUR COMMENTS