किनपाया वार्षिक प्रगतिया समीक्षा बैठक
किपू- किपू नगरपालिकाया आः नकतिनि च्वंगु छगू बैठकं नगरपालिकाया वार्षिक प्रगतिया समीक्षा याःगु दु । नगरपालिकापाखें आर्थिक दँ ०७७÷७८ य् जूगु थीथी ज्यायात कयाः समीक्षा याःगु खः ।
किपू नगरपालिकाया प्रमुख रमेश महर्जनया सभापतित्वय् वंगु आर्थिक दँय् जूगु विकास निर्माण लगायत थीथी ज्याया प्रगतिया विषययात कयाः जूगु समीक्षा बैठकय् नगरया झिगुलिं वडाया वडाअध्यक्ष, कार्यपालिकाया दुजःपिं, शाखा प्रमुख व कर्मचारीतय् उपस्थिति दुगु खः ।
न्हापांखुसी च्वंगु थुकथंया समीक्षा बैठकय् कोरोना भाइरस संक्रमणया जोखिम व स्वास्थ्य सुरक्षा मापदण्डयात ध्यानय् तयाः बैठक च्वंगु खः । बैठकय् वडाअध्यक्ष, शाखा प्रमुख व सम्बन्धित कर्मचारीतय् जक उपस्थिति दुगु खः ।
बैठकय् नगर प्रमुख महर्जनं आवश्यक भ्वं मिले मयायेगु व ध्यान मबीगु ज्यां यानाः नं बेरुजु पिहां वइगु खः धासें थथे जुल धाःसा गुगुं नं संस्थाय् बेरुजु पिहां वइबलय् आम जनमानसं भ्रष्टाचारया आशंका याइगु स्वाभाविक खः धयादिल ।
उपप्रमुख सरस्वति खड्कां लसकुस यासें नगरपालिका व सेवाग्राहीया सम्बन्धयात कयाः प्रष्ट यानादीगु खःसा प्रमुख प्रशासकीय अधिकृत कृष्णप्रसाद सापकोटा ज्याझ्वःया उद्देश्ययात कयाः स्पष्ट यानादीगु खः ।
बैठकय् सम्बन्धि शाखाया प्रमुख व कर्मचारीतय्सं थःथःगु प्रस्तुति नं बियादीगु खः । समीक्षा बैठकय् शिक्षा, आन्तरिक लेखा परीक्षण, योजना व प्राविधिक, सामाजिक विकास, सहकारी, लेखा, पञ्जीकरण, स्वास्थ्य, पशु विकास, आयुर्वेदिक, सूचना व प्रविधि शाखा लगायतया शाखा प्रमुखं थःथःगु शाखाया प्रगति विवरण न्ह्यब्वयादीगु खः ।
LEAVE YOUR COMMENTS