ने. सं. ११४६ अनलागा अष्टमी -

ओलीं कोरोना न्यंका जूगु द्वपं बिसें उजुरी

येँ – नेकपा (एमाले) या अध्यक्ष केपी शर्मा ओलीयात कारबाही यायेमाःगु माग यासें जिल्ला प्रशासन ज्याकू ख्वपय् उजुरी लाःगु दु । ओलीयात संक्रमण रोग ऐन, २०२० कथं कारबाही यायेत माग यासें अभिजित अधिकारी व विरेन्द्र मडैं उजुरी बिउगु खः ।

अध्यक्ष ओलीं थः संक्रमित जुयाच्वंगु इलय् माघ १२ गते एमाले भातृ संगठनं ग्वसाः ग्वःगु हिदान ज्याझ्वलय् ब्वति कयाः कोरोना संक्रमण न्यंकूगु द्वपं उजुरीइ बियातःगु दु ।

उजुरीइ धयातःगु दु, ‘थः कोरोना संक्रमित जुयाच्वंगु सीक सीकं सार्वजनिक थासय् वनाः मेपिं मनूतलिसे सम्पर्कय् वयाः कोरोना संक्रमण न्यंकेगु ज्या यानाः संक्रमण रोग ऐन, २०२० अःखः ज्या याःगुलिं निज केपी शर्मा ओलीयात कानुन बमोजिम कारबाही यायेमाः ।’