गामय् वंपिं लिहां वयेगु अप्वयेवं क्वथाया अभाव शुरु

येँ (नेपालभाषा टाइम्स) – विश्वन्यंकं न्यनावंगु कोरोना भाइरसया कारणं सरकारं याःगु लकडाउनया इलय् खाली जूगु येँया क्वथात आः हाकनं जायेगु क्रम शुरु जूगु दु । ताः ई तक लकडाउन जुयाः थःथःगु गामय् लिहां वंपिं मनूत धमाधम लिहां वयेगु शुरु जुइवं येँय् खाली जुयाच्वंगु क्वथा काइपिं हानं अप्वया वःगु खः । सरकारं वंगु चैत ११ गते लकडाउन घोषणा यायेवं आपालं स्वनिगलं पिनेया मनूत थःथःगु गामय् लिहां वंगु खःसा थुकिं यानाः थन क्वथा व पसः कवः खाली जुया वंगु खः । थ्यंमथ्यं खुला तक गामय् च्वनेधुंकाः नयेत्वनेगु समस्या जुइवं आपालं मनूत हानं येँय् तुं लिहां वयेगु क्रम शुरु जूगु दुसा थुकिं यानाः स्वनिगलय् बालं च्वनीपिं नं हानं अप्वया वंगु दु ।

थौंकन्हय् येँय् लकडाउन न्ह्यःथें हे चहलपहल शुरु जुइधुंकूगु दु । न्हापा येँय् क्वथात मालेत समस्या जुइगु खःसां लकडाउन लिपा क्वथा खाली जुयाच्वंगु खः । तर आः हाकनं स्वनिगलय् मनूत लिहां वयेवं क्वथा मालेत नं न्हापा थें समस्या जुयाच्वंगु दु । लकडाउन जुइधुंकाः येँया व्यस्त बजाः न्हूसतक, थँबही लगायतया थासय् आपालं पसः खाली जुयाच्वंगु खःसा आः अज्याःगु पसः हाकनं जायेगु क्रम शुरु जुइधुंकूगु दु । अय्नं थँबही लागाय् धाःसा आः तक नं ३० प्रतिशत स्वयां अप्वः पसः खाली जुयाच्वंगु दनि ।

थँबहीया पसः खाली जुयाच्वंगु मू कारण धाःसा थँबही पूर्णरुपं पर्यटकीय लागा जूगुलिं खः धइगु स्थानीय व्यवसायीतय् धापू दु। थँबहीया व्यवसाय पूर्ण रुपं विदेशी पर्यटनय् आश्रित जुयाच्वंगुलिं अन पसः पूर्ण रुपं जायेत ई काये फइगु अनुमान दु । विश्वन्यंकं कोरोना भाइरसया महामारी निगूगु चरण पार यायेधुंकूगुलिं पर्यटकत भ्रमणया निंतिं वनेगु क्रम म्हो जूगुलिं पर्यटक वइगु सम्भावना अनुमान यासें व्यवसायीतय्सं तत्काल पर्यटन क्षेत्रय् लगानी याइगु सम्भावना नं मदुगुलिं थँबहीया पसः जायेकेत ई काइगु खँ नं पर्यटन व्यवसायीतय्सं धाःगु दु ।

लकडाउनया झ्वलय् स्वनिगलं १८ लाख मनू पिहां वंगु खःसा उकी मध्ये न्यागू निसें खुगू लाख मनूतय्सं आः थःपिनिगु हे गामय् स्थायी रुपं च्वनेगु कथं व्यवस्था यायेधुंकूगु अनुमान डेरावाल संघं याःगु दु । कारोना संक्रमणया कारणं येँय् थःगु रोजगारी मदयेधुंकाः गामय् लिहां वनाः स्थायी प्रकृतिया रोजगारी यायेधुंकूपिं मनूत आः येँय् लिहां वइगु सम्भावना कम जक दुगु खँ संघं धाःगु दु ।

सम्बन्धित बुखँ

LEAVE YOUR COMMENTS